Италийн Ром хотноо болсон эмэгтэй жүдочдын Европийн нээлттэй тэмцээнээс Гавьяат тамирчин М.Уранцэцэг, ОУХМ Д.Сумъяа нар хүрэл медаль хүртжээ. 52 кг-д өрсөлдсөн Гавьяат тамирчин М.Уранцэцэг эхний тойрогтоо хийлж, дараагийн барилдаанд Японы жүдоч Нацуми Гомиг ялсан. Зооны аваргын төлөөх барилдаанд БНХАУ-ын Еиннан Мад ялагдсан юм. Улмаар дагах барилдаанд Мексикийн Лус Олвера, Монгол Улсын Ч.Аззаяа нарыг ялж, хүрэл медаль хүртсэн байна. Энэ жинд өрсөлдсөн Ч.Аззаяагийн хувьд эхний тойрогт хийлж, дараагийн барилдаанд Румын Роксана Ёнка, Бельгийн Лотте Деноо нарыг ялж, зоогоо тэргүүлсэн. Харин мөнгөн медалийн төлөөх барилдаанд Италийн Одетте Гиуффридад ялагдаж, хүрлийн төлөө Гавьяат тамирчин М.Уранцэцэг дийлдлээ.
Харин 57 кг-ын жинд өрсөлдсөн ОУХМ Д.Сумъяа эхний тойрогт хийлж, дараагийн барилдаанд БНХАУ-ын тамирчин Ен Жоуг ялсан. Зооны аваргын төлөөх барилдаанд Японы Криста Дегучид ялагдсан юм. Улмаар дагах барилдаанд Их Британийн Некода Дэвис, Италийн Алессия Регис нарыг ялж, хүрэл медаль хүртлээ.
Италийн Ром хотноо болсон Европийн нээлттэй тэмцээнд Монголын зургаан жүдоч өрсөлдсөн. 48 кг-ын жинд ОУХМ Г.Отгонцэцэг, 52 кг-ын жинд Ч.Аззаяа, 63 кг-ын жинд Б.Мөнгөнчимэг нар тавдугаар байрт шалгарлаа.
2014 оны эмэгтэй жүдочдын Европийн нээлттэй тэмцээнд 33 орны 159 тамирчин өрсөлдсөн. Манай жүдочид хоёр хүрэл, гурван тавдугаар байрын шагнал хүртлээ.
Харин эрэгтэйчүүдийн Европийн нээлттэй тэмцээн Австри улсын Оберварт хотноо болж, А.Батсуурь, Г.Одбаяр нар мөнгөн хүртсэн билээ.
