УИХ-ын гишүүн Ж.Батзандан өөрийн төрсөн ах, "Монсам"  компанийн захирал Ж.Бат-сүрэнг ёс зүйгүй авирласан гэж ажлаас нь чөлөөлүүлэх хүсэлт гаргасан. Учир нь түүний ах гаалиар авч гарах барааныхаа татварыг төлөхгүй хэмээн танхайрсан гэдэг.

Ингээд Ж.Батзандан гишүүний гаргасан хүсэлтийн дагуу ахыг нь ажлаас нь чөлөөлсөн билээ. Харин Ж.Батзандангийн бас нэгэн ах болох Монголын Цахилгаан холбоо компанийн захирал Ж.Бат-Эрдэнэ түүнийг буруутгаж ажлаас халуулсан ахыгаа өмөөрсөр байна.

 Үүнээс хойш ах дүү хоёр хэвлэлээр бие биедээ үг дайж байгаа бөгөөд энэ талаар өөр өөрсдийн тайлбарыг одоог хүртэл хийсээр байна.

УИХ-ын гишүүн Ж.Батзандангийн хувьд “Би өөрөө шудрага ёсны төлөө тэмцэж, шудрага байх талаар ярьдаг хүн. Тиймээс энэ чиг шугамаа үргэлж баримтална. Ахын тухай гомдол надад орж ирсэн. Тэр үед надад хоёр л сонголт байсан. Нэг нь гомдлыг нь хав дарах. Нөгөө нь хүмүүсийг гомдолгүй болгож ахыгаа ажлаас нь чөлөөлүүлэх. Тэгэхээр би шудрага байх үүднээс ах гэлтгүй арга хэмжээ авахыг холбогдох газруудад нь хэлсэн” билээ. 

Тэгвэл тус хэргийн талаар түүний ах Ж.Бат-Эрдэнэ ажлаас халуулсан ахыгаа өмөөрч бид Ж.Батзандангийн нөлөөгөөр ямар нэгэн албан тушаалд очиж байгаагүй гэх утгатай зүйлийг хэвлэлд ярьжээ. Тэрбээр “Би Ж.Батзанданг оюутан байхад яамны том дарга байсан. Гудамжинд байхад нь агентлагийн дарга байсан. Би төрийн албаны том даргын ажлыг намаар явж аваагүй. Цаашдаа ч энэ хүнээс юм хараад байхыг хүсэхгүй” гэсэн тайлбарыг хийсэн. Үүнээс үзвэл ах нь дүүдээ их л гомдсон бололтой юм.

 Дашрамд дурдахад Ж.Бат-Эрдэнэ нь одоо Монголын Цахилгаан холбоо компанийг удирдаж байгаа юм. Тэрбээр удирдаж буй компаниа уналтад орж байгаа талаар олон нийтэд зарлажээ. Цаашлаад тус компаниас төрийн оролцоог салгаж, шинэ бизнес эрхлэх боломжийг нь олгох хэрэгтэй гэдгийг сануулсан байна.