Аваргуудын лигийн хасагдах шатны эхний хоёр тулаан өнгөрсөн шөнө манай цагаар 03:45-аас явагдлаа. Испаний алдарт “Барселона” Англид зочилон “Манчестер Сити”-гийн талбай дээр  тоглов.

Тоглолтын 53 минутад “Сити”-гийн Аргентин залуу Мартин Демичельс торгуулийн талбайдаа алдаа хийн улаан хуудсаар шагнуулж, талбайгаас чөлөөлөгдөв. Пенальтийг Месси амжилттай гүйцэтгэж, багтаа тэргүүлийг авчирсан юм. Энэ гоол нь түүний аваргуудын лигт оруулж буй 66 дахь гоол ажээ.

Талбай дээр арвуулаа үлдсэн “Сити”-д хамгаалахаас өөр  сонголт үлдсэнгүй. Тэд тоглолтын 90 дахь минут хүртэл хаалгандаа гоол алдсангүй амжилттай хамгаалж байв. Гэвч “нэгээр илүү бол мянгаар илүү”-гийн үлгэрээр бүрэн бүрэлдэхүүнээрээ тоглож буй “Барса” ахин гоол хийхгүй бол ичгэвтэр хэрэг. Тэд 90 дахь минутад Жо Хартийн хаалгыг мялаав. Гоолыг Дани Алвес оруулсан юм.

Ийнхүү тоглолт 2:0-ээр “Барса”-гийн ялалтаар өндөрлөв. Одоо “Сити” онолын хуьд маш хэцүү боломж үлдээд байна. Тэд “Барса”-гийн талбайгаас хоёр болон түүнээс олон гоолын зөрүүтэй ялалт авах хэрэгтэй. Хэрэв ингэж чадвал тэд шөвгийн наймд үлдэх учиртай.

Эх сурвалж: Hiimori.mn