2009 онд Атлантын далайд унасан 228 зорчигчтой Францын онгоцыг олох гэж багагүй хугацаа зарцуулж, зарим хохирогчийн цогцсыг хоёр жилийн дараа гаргаж авсан юм. Мөн 2007 онд Индонезийн алга болсон онгоцыг долоо хоногийн дараа олж байв. Харин өнөөдөр 239 зорчигчтой Малайзын онгоц далайн ёроолд унасан нь тодорхой байгаа ч олж чадаагүй байна. Австралийн Квинслендийн их сургуулийн агаарын инженерийн сургуулийн профессор Майкл Смарт “Онгоц далайн дунд унасан бол хэзээ олдохыг хэлж мэдэхгүй юм” хэмээн ярьжээ. Эрлийн багийнхан онгоц холбоо тасрахаас өмнө байрлаж байсан газраасаа хэдэн зуун километрийн зайтай байгаа гэсэн таамаглалыг дэвшүүлсэн ажээ. Агаарын тээврийн мэргэжилтнүүд ямар ч онгоц хэзээ нэгэн цагт олддог гэж хэлж байгаа ч 1958 онд алга болсон онгоц өнөөг хүртэл олдоогүй тохиолдол гарчээ. Тэгвэл 25 жилийн турш нисэгчээр ажилласан Жон М.Кокс орчин үед харилцаа холбооны хэрэгсэл төгс хөгжсөн учраас сүйрсэн онгоцыг олоход саадгүй гэж үзжээ. Түүнийхээр онгоц дэлбэрсэн ч гэсэн ул мөр нь олдох ёстой гэнэ. Шинжээчдийн хэлж буйгаар онгоцны бүхээгт мэдээллээр хангахад шаардлагатай дэвшилтэт бүтээгдэхүүн суурилуулсан тул байршлыг нь хиймэл дагуулын тусламжтайгаар илрүүлэх боломжтой юм. Онгоцны хар хайрцганд бүх мэдээлэл хадгалагдаж үлдсэн гэж тэд найдаж байна. 1990 оноос хойшхи томоохон ослуудын дийлэнх нь шатахуун асгарсанаас үүдэлтэй болохыг тогтоосон ажээ. Тиймээс Малайзын онгоцын ул мөр олдохгүй байгаа учраас дэлбэрсэн байх магадлалтай гэсэн таамаглал зонхилж байна.