Бусдын эд хөрөнгийг хувьдаа завшсан гэх үндэслэлээр шалгагдаж байгаа “Ноёд констракшн” компанийн захирал С.Билэгтийн өмгөөлөгчид өнөөдөр мэдээлэл хийлээ.

Тэд С.Билэгтийг компаниа хууль ёсных нь дагуу худалдаж авсан гэж мэдэгдээд хэрэг эцэслэн шийдэгдээгүй байхад үйлчлүүлэгчийнх нь тухай буруу ташаа мэдээлэл тараахгүй байхыг хүссэн юм.

Түүний өмгөөлөгч Б.Оюунбилэг "Хэрэг шийдэгдээгүй  байгаа болохоор бид үнэхээр залилсан юм уу, үгүй юм уу гэдэг дээр тодорхой мэдээллийг өгөх боломжгүй байна. Харин энэ компанийн түүхийг товчхон хэлэхэд "Ноёд" компанийг 2004 оны эцсээр Дамдиндорж гэдэг хүн үүсгэн байгуулсан байдаг. Энэ компани нэг сая дүрмийн сантай нэг хүний бүрэлдэхүүнтэй байгуулагдсан. Тэрээр компаниа 2005 онд Ганбат гэж хүнд нэг сая төгрөгөөр худалдсан. Ганбат 2008 онд Сүхбямба гэдэг хүнд компаниа  шилжүүлсэн бөгөөд Сүхбямба нь 2009 онд Батжаргал гэдэг хүнд зарсан юм билээ. Батжаргал нь болохоор 2012 онд С.Билэгт буюу бидний үйлчлүүлэгчид худалдсан юм. Улсын бүртгэл дээр ийм бүртгэл байдаг бөгөөд худалдах худалдан авах гэрээнүүд нь хууль дүрмийн дагуу хийгдсэн байдаг. Өнөөдрийг хүртэл хүчин төгөлдөр байгаа. Ийм л асуудал. Нэг гишүүнтэй нэг сая төгрөгийн дүрмийн сантай байсан энэ компанийг С.Билэгт гэдэг хүн худалдаж авсныхаа дараа "Сэлэнгэ-888" гэдэг хотхоны 130 гаруй айлын орон сууцыг ашиглалтад өгөөд байна. Мөн энэ компани өмнө нь ямар нэгэн үйл ажиллагаа явуулж улсад татвар төлж байгаагүй. Харин С.Билэгт худалдаж авсанаасаа хойш тодорхой хэмжээний татварыг нь төлөөд 80 гаруй орон тооны ажилтантай компани болгосон" гэв.

Түүнчлэн Сэлэнгэ аймгаас С.Билэгтийн нэр дээр нэхэмжлэл ирсэн нь эд хөрөнгийн улсын бүртгэлтэй холбоотой бөгөөд цагдаагийн харъяаллын асуудал биш хэмээлээ.

Дээрх хэрэг одоогоор мөрдөн байцаалтын шатандаа явж байна.