ҮДБЭЧ-ын уран бүтээлчид Цэргийн баярыг тохиолдуулан энэ сарын 16-нд Монголын анхны “Нарны домог” бүжгэн жүжгийг тайзнаа толилуулна.Эв нэгдэл, эрх чөлөөний билгэдэл болсон энэхүү бүжгэн жүжигт Алангуа эхийн ариун сургаалаар, багцалсан таван сум лугаа адил эвсэн нэгдэж эрч хүч, эрдэм авьяасаараа дайснаа даран дархан цолоо мандуулан ард олноо амар жимэр аз жаргалтай болгож байгаа баатарлаг хөвгүүдийн тухай бүжгийн уран тансаг хөдөлгөөнөөр дүрслэн харуулдаг.
Ардын уран зохиолч Б.Лхагвасүрэнгийн цомнол, Хөдөлмөрийн баатар хөгжмийн зохиолч Д.Лувсаншаравын хөгжим бүжгэн жүжгийг Төрийн соёрхолт, бүжиг дэглээч С.Сүхбаатар найруулжээ.
Жүжгийн гол дүр Алангуа ээжид бүжигчин Т.Ариунжаргал, М.Бямбаа, манлай таван баатрын дүрд жүжигчин А.Батхүү, Х.Хашхүү, О.Тулга, Э.Ганзориг, З.Цэцэн-Эрдэнэ нар бүжинэ. Бүжгэн жүжигт ҮДБЭЧ-ын бүжигчид, Үндэсний хөгжмийн их найрал, найрал дуучид, Монголын хүүхдийн ордны бүжгийн дугуйлангийн сурагчид оролцох юм.
