“Beyond  the music” олон улсын хөгжмийн наадамд Монгол Улс тав дахь удаагаа оролцохоор Испани улсыг зорино.

  Ирэх зургадугаар сарын 14-22-нд Испани улсын Барселона хотын дэргэдэх Бенаск тосгонд уг наадам болох юм. Фестивальд энэ жил манай улсаас оролцох хөгжимчдийг  төгөлдөр хуурч С.Саянцэцэг удирдан явах аж.  Энэхүү хөгжийн наадамд оролцохыг Испаниас төгөлдөр хуурч С.Саянцэцэгт анх санал  тавьж, хүлээн зөвшөөрснөөр жил бүр уламжлал болгон хийдэг болжээ. Тэрээр фестивалийн урлаг, соёлын асуудлыг хариуцан ажиллах бол түүний нөхөр Ричард Синар ерөнхий зохион байгуулагчаар ажиллах юм. Фестивалийг Испаны Засгийн газраас ивээн тэтгэсээр иржээ. Өсвөрийн төгөлдөр хуурчдын авъяасыг сорих эл тэмцээнийг үзэж сонирхох хүмүүс жуулчны чиглэлээр явах боломжтойг Монголын Залуучуудын аялал жуулчлалын корпорацийн захирал Э.Хишигбаяр хэлэв. Учир нь тус корпораци “Beyond the music” хөгжмийн фестивальтай аялал жуулчлалын түншээр хамтран ажилладаг бөгөөд тус корпорациас уг фестивалийг үзэж сонирхох  хүсэлтэй иргэдийг ирэх сарын 15 хүртэл Монголын залуучуудын холбооны байранд бүртгэнэ.