Өнгөрсөн аравдугаар сарын 8-нд Баянхонгор аймгийн 2А ангийн сурагч Н.Энхбилэг сургууль дээрээ сахуу татрангийн вакцин хийлгэснээс үүдэн хөл, гарын хуруу нь үхжиж, одоогийн байдлаар БНСУ-д эмчилгээ хийлгэж байгаа юм. Эмч нарын буруу үйлдлээс болж долоон хурууныхаа үеийг тайруулах шаардлагатай болсон охины хагалгааны төлбөр 25 сая вон бөгөөд монгол мөнгөөр 41 сая 750 мянган төгрөг болоод байгаа аж. Тиймээс Н.Энхбилэг охинд туслахаар “Хонгор нутгийн хөгжлийн төлөө төв”-ийн залуучууд санаачлан “Хонгор нутгийн дуулал” хандивын тоглолтыг зохион байгуулж байгаа юм. Тоглолт энэ сарын 20-нд “Монгол бөхийн өргөө”-нд тоглогдох ба тоглолтонд урилгаар СТА Баасандорж, МУГЗ, Төрийн соёрхолт Сосорбарам, дуучин Насанбуян, Отгонжаргал, Номин-Эрдэнэ, Жонон хамтлаг оролцож байгаа аж. Тоглолтын тасалбарын үнэ 10 мянган төгрөг ба Монголын бөхийн өргөөний билетийн касс, Монголын Залуучуудын холбоо дээр худалдаалагдаж байна.


Мөн цагдаагийн газрын Мөрдөн байцаах тасгийн ахлах мөрдөн байцаагч хошууч Г.Батаа энэ сарын 1-ний өдөр Эрүүгийн хуулийн 106-р зүйлийн 106.1 дэх хэсэгт зааснаар энэ хэрэгт эрүүгийн хэрэг үүсгэн мөрдөн байцаалт явуулж эхэлсэн.

Шалгалтын явцад Халдварт өвчин судлалын төвийн их эмч С.Ананд, Д.Алтанзул нарын урьдчилсан тандалт, газар дээр нь ажиллаж гаргасан дүгнэлт зэргээс Н.Энхбилэг болон Эрдэм ахлах сургуулийн сурагчдад хийсэн Энэтхэг улсад үйлдвэрлэгдсэн BN021L3001A серийн дугаартай СТ-2 гэсэн вакцины чанар, түүний хадгалалт хамгаалалаас болж Н.Энхбилэгийн бие муудаагүй харин дархлаажуулалттай давхцаж илэрсэн бие даасан өвчин буюу “Синдром Стевенса Джонсона” гэсэн өвчний оношийг урьдчилсан байдлаар гаргасан байна.

Баянхонгор аймгийн Эрүүл мэндийн газрын даргын тушаалаар “вакцин тарих үеэр сурагчдад үзлэг оношлогоо хийх байсан "Оточномгон" өрхийн эмнэлгийн их эмч Н.Дэжидмаа нь Эрдэм ахлах сургуулийн сурагчдад вакцин хийх үеэр хүндэтгэн үзэх шалтгаангүйгээр үзлэг хийгээгүй, 2013 оны 10-р сарын 14 өдөр Н.Энхбилэгийг вакцинаас харшилсан байдал, өвчний зовиуртай ээжийн хамт ирж үзүүлэх үеэр зохих эмчилгээ, оношилгоог зөв тавиагүй, холбогдох Эрүүл мэндийн байгууллагад мэдэгдэх үүргээ биелүүлээгүй, тус эмнэлгийн сувилагч Э.Даваа Эрдэм ахлах сургуулийн эмч Н.Дуламсүрэн  нар нь сурагчдад вакцин хийх үеэр бүх сурагчдыг үзлэгт хамруулаагүй тарилга хийхийн өмнө нэг удаагийн зүү тариур хэрэглэсэн эсэх, вакцинийг зохих ёсоор хадгалж хэрэглэсэн эсэх, хэрэглэсэн зүү тариур вакцины шил шошгийг зохих этгээдийн зөвшөөрөлгүйгээр устгасан … зэрэг үйлдэлд нь эрүүгийн хуулийн 106-р зүйлд заасан гэмт хэрэгт холбогдуулан шалгаж байгаа ажээ.

Энэ хэрэгт мөрдөн байцаалтын ажиллагаа хийгдэж байгаа бөгөөд аймгийн Мэргэжлийн хяналтын газар, Шүүхийн шинжилгээний үндэсний хүрээлэн зэрэгт шинжээч томилж “нэр бүхий эмч, эмнэлгийн байгууллагын ажилтанууд эмчилгээ үйлчилгээг зохих ёсоор үзүүлсэн эсэх, холбогдох вакцин, тариур зэргийн чанар стандарт, хадгалалт хамгаалалт, хэрэглэсэн байдал зөв эсэх  Н.Энхбилэгийн өвчний шалтгаан нөхцөл эх сурвалж юу болох, урьд суурь өвчтэй байсан эсэх вакцинаас болж өвчилсөн эсэх, 2 хуруугаа тайруулсан болон биед гарсан бусад өвчлөл нь гэмтлийн зэрэгт хамаарах эсэх зэрэг асуудлыг шалгаж тогтоох зорилгоор Баянхонгор аймгийн прокурорын газраас прокурорын даалгавар бичиж хяналт тавин ажиллаж байна.