Урт удаан хугацаанд намын өмчлөлд ашиглагдсаар ирсэн Ленины музейн өмчлөлтэй холбоотой маргаан хамгийн сүүлд дээд шүүхээс төрийн өмч гэдгийг нь баталснаар эцэслэгдсэн.

Үүний дагуу музейн барилгыг хүлээлгэн өгөх тухай албан шаардлагыг МАН-д хүргүүлсэн бөгөөд өнөөдөр барилгыг хүлээн авах  ажиллагаа болох байсан юм.

Ийнхүү Ленины музейг хүлээж авахаар ССАЖЯ-ны Төрийн нарийн бичгийн дарга П.Алтангэрэл тэргүүтэй ажлын хэсэг очсон боловч МАН-аас хүн ирэлгүй тэд гар хоосон буцлаа.

Ямартай ч бид ССАЖЯ-ны Төрийн нарийн бичгийн дарга П.Алтангэрэлээс дараах тодруулгыг авсан юм.

П.Алтангэрэл:Төрийн өмч мөн гэдгийг тогтоочихоод байхад одоо хүртэл хүлээлгэж өгөхөөс татгалзаад байгааг үнэхээр ойлгохгүй байна

-МАН-аас музейн барилгыг хүлээлгэн өгөх шаардлагад ямар нэгэн хариу өгсөн үү?

-Төрийн өмчийн хороо МАН-д энэ сарын 14-нд музейг өнөөдөр 13.00 цагаас хүлээж авах албан бичиг хүргүүлсэн. Үүний дагуу музейгээ хүлээн авахаар ирээд байна. Манай үлэг гүрвэлийн төв музейн захирал дөнгөж сая МАН-ын  Ш.Раднаасэд /МАН-ын Хэрэг эрхлэх газрын Намын байгуулалтын хэлтсийн дарга/ гэдэг хүнтэй ярихад "Юу яриад байгаа юм?" гээд утсаа тасалчихлаа. Би өөрөө залгахаар миний утсыг авахгүй байна. Тэгэхээр одоо яахыг мэдэхгүй байна. Энэ барилга дөрвөн шат дамжаад Төрийн өмч мөн гэдгийг тогтоочихоод байхад одоо хүртэл хүлээлгэж өгөхөөс татгалзаад байгааг үнэхээр ойлгохгүй байна. Бид жил гаруй шүүхээр явлаа. 10 гаруй удаа МАН-ын саналаар шүүх хурлыг хойшлуулж байсан. Жилийн өмнө бид авчихсан бол  одоо барилга байшингаа засаад үйл ажиллагаагаа эхлүүлчих боломжтой байлаа.

-МАН музейн данс бүртгэлээ өгсөн үү?

-Бид данс бүртгэлээ хүлээж аваагүй. Ноднин бид үзмэрээ хүлээн авах гээд чадаагүй. Ядаад бид цагдаад хандсан. Цагдаагийн байгууллагад МАН-аас тэнд байсан бүх үзмэрүүд шатсан учраас өгөх боломжгүй гэсэн хариу өгсөн байсан.

-Шатсан баримт байдаг уу?

-Баримт байхгүй. Зүгээр л тайлбар өгсөн.

-ОХУ МАН-д энэ барилгыг бэлэглэсэн гэх баримт олдсон, тэд үүний дагуу шүүхэд дахин гомдол гаргахаар болсон гэх мэдээлэл зарим мэдээллийн хэрэгслээр цацагдаад байна?

-Ер нь Монголын асуудлыг Москвад шийдэхээ болиод удаж байгаа шүү дээ.

-Одоо та бүхэн ямар арга хэмжээ авах гэж байна?

-Бид одоо яахав дээ. Түлхүүр энэ тэр нь байхгүй юм чинь. Ямар ч байсан очоод МАН-ынхантай ярья. Хэдийд боломжтой эсэхийг нь асууя.