Мисс Б.Гантогоо, Х.Бадамгэрэл нарын урилгаар 2008 оны дэлхийн миссийн дэд байрын шагналт Энэтхэг улсын гоо бүсгүй жүжигчин, дуучин Парвати Оманакуттан Монголд ирсэн билээ.

Тэрээр Монголд ирсэн нь хүүхэд эмэгтэйчүүдийн эсрэг хүчирхийллийн аяныг дэмжин ажиллахтай холбоотой бөгөөд аяныг зохион байгуулагч миссүүд өнөөдөр энэ талаар сэтгүүлчдэд мэдээлэл хийлээ.

Манай улсад хоёр дахь удаагаа ирж буй Парвати Оманакуттан энэ үеэр "Юуны өмнө миний бие Монголд дахин ирсэндээ баяртай байна. Намайг халуун дотноор хүлээн авсан та бүхэнд баярлалаа. Энэ удаа би “Мисс монголиа аялал жуулчлалын холбоо”-ны урилгаар ирсэн байгаа. Энэ холбооныхоо чиглэлээр болон хүүхэд эмэгтэйчүүдийн эрхийг хамгаалах асуудлаар олон арга хэмжээнүүдэд оролцоно" гэсэн юм.

Миссүүд өнөөдөр охид эмэгтэйчүүдийн эсрэг хүчирхийллийн асуудлаар УИХ дахь эмэгтэй бүлгийн гишүүдтэй уулзалт хийхээр болсон байна. Түүнчлэн энэ чиглэлээр үйл ажиллагаа явуулдаг ТББ болон сангуудад хандив өгөх зорилготой сайн үйлсын арга хэмжээг энэ сарын 20-нд Velvet клубт зохион байгуулахаар болжээ.