Өнгөрсөн шөнө английн ПЛ-ийн 30, 31 дүгээр тойргийн тоглолтууд явагдаж хүснэгтийг тэргүүлж буй “Челси” талбай дээрээ “Арсенал”-ыг хүлээж авлаа.

Тус тоглолт “Арсенал”-ын алдарт дасгалжуулагч Арсен Венгерийн багтайгаа хийж буй 1000 дахь тулаан нь байсан юм.

Тоглолт эхлээд “Их Буучид” хоёр ч удаа хаалга руу дотволсон хэдий ч “Челси”-ийн хамгаалалт найдвартай байлаа. Тав дахь минутад “Челси” сөрөг довтолгоонд шилжив. Шюррле-гийн дамжуулалтыг Это тогтоож аваад зүүн хөлөөрөө хаалганы  зүүн тал руу цохиж  гоолдсон. “Челси”-ийн хөгжөөн дэмжигчид гоолын баяр тэмдэглэж дуусаагүй байхад буюу тус гоолоос хоёрхон минутын дараа Шюррле өөрийн гоолоо Щенсный-ийн хаалганд шигтгэж орхив. Түүнд дамжуулалтыг Матич хаяж өгчээ.

Тоглолтын ес дэх минутад эхний гоолын эзэн Это бэртэж талбайг орхисон бөгөөд түүнийг орлож Торрес талбай дээр гарч ирлээ.

Тоглолтын 15 дахь Эден Азар-ын цохисон бөмбөгөнд Алекс Окслейд-Чемберлен гар хүрч багаа хөөдсөн. Шүүгч түүнийг шийтгэхийн оронд багийнхан анд Гибсс-ийг улаан хуудсаар шагнаж “ташаа” шийдвэр гаргасан. Торгуулийн талбай дотор байсан учир  “Челси” мэдээж хэрэг пенальт гүйцэтгэх эрхтэй. Цохилтыг Азар амжилттай гүйцэтгэв. Тооны харьцаа 3:0 “Арсенал” талбай дээр аравуулаа тоглолт дуусахад 70 гаруй минут үлдсэн байлаа.

Гурав дахь гоолын дараагаар “Арсенал” төлөвлөгдөөгүй сэлгээгээ хийсэн юм. Тэд Подолски-г суулгаж,  Вермален-г гаргаж ирэв.

Тоглолт “Челси” довтлох маягтай “Арсенал” хамгаалсан темфээр явагдаж эхэлсэн. 36 дахь хоромд “Арсенал” довтолгоонд шилжиж, Касорла хаалга руу цохисон хэдий ч хаалгач аюулыг холдуулж чадсан.

Эхний үеийн 42 дахь минутад Бразил залуу Оскар “Арсенал”-ын хаалганд багийнхаа дөрөв дэх гоолыг оруулж, нэгдүгээр хагас дууслаа.

Хоёрдугаар үе эхлэхэд “Арсенал” довтлох чиглэлийн тоглогчдоо амрааж, хамгаалалтын шугамаа зутгасан давхар сэлгээг хийж харагдсан.

Тоглолтын  66 дахь минутад Оскар дубль хийж, багийнхаа тав дахь бөмбөгийг Щенсный-ийн хаалганд хийв. Хоёр багийн тулаанд “Челси” хожих нь нэгэнт ойлгомжтой боллоо.

Энэ тулааны сүүлийн гоол 71 дэх хоромд орсон. Гоолыг сэлгээгээр гарч ирсэн “Челси”-ийн Мохамед Сала оруулсан юм.
Тоглолт дуусах хүртэл ахиж хаалганы тор хөдөлсөнгүй. Талбай дээрээ том хожил байгуулсан “Челси” 69 оноотой болж, хүснэгтийг тэргүүлсэн хэвээр байна. Харин “Арсенал” энэ тойргоос оноо авч чадалгүй 62 оноотойгоо дөрөвт бичигдэж байна.

Эх сурвалж: hiimori.mn