Булган аймгийн Хуулийн байгууллагуудын нэгдсэн Зөвлөгөөн саяхан зохион байгуулагдаж, уг Зөвлөгөөнд  аймгийн Засаг дарга, ИТХ-ын дарга нар болон гэмт хэргээс урьдчилан сэргийлэх ажлыг зохицуулах зөвлөлийн гишүүд оролцжээ.

Аймгийн прокурор Ш.Эрдэнэбилэгээс тус прокурорын газрын  2012, 2013 оны хяналтын ажлыг харьцуулж, дүн шинжилгээ хийсэн байдлаар танилцуулага хийж, ихэнхи тоон үзүүлэлтүүд өссөн, түүний шалтгаан нөхцлийн талаар тодорхой мэдээлэл хийсэн байна

Тухайлбал: Аймгийн хэмжээний ажилгүйдлийн түвшин 13,3 хувьтай байгаа нь улсын дунджаас дээгүүр, үүнтэй холбоотойгоор гэмт хэрэг үйлдэгчийн 70  гаруй хувь нь эрхэлсэн тодорхой ажилгүй байгаа ажээ.

Гэмт хэрэг үйлдэгсдийн 70 шахам хувь нь согтууруулах ундааны зүйл хэрэглэсэн үедээ гэмт хэрэгт холбогдсон байгаа нь архины хэрэглээ багасаагүй, нийгмийн сөрөг үзэгдлийн шалтгаан хэвээр байна

Тус аймгийн нутаг дэвсгэрийг хатуу хучилттай зам 3 чиглэлээр дайран өнгөрч хөрш зэргэлдээ аялал, жуулчлал зах зээл хөгжсөн аймгуудтай холбогдсонтой холбоотойгоор “замын хөдөлгөөний аюулгүй байдлын хууль тогтоомж зөрчих” гэмт хэргийн гаралт өсөж байгаа дүн гарчээ.

Булган аймгийн нутаг дэвсгэрээс хулгайлагдсан мал болон малын гаралтай бүтээгдэхүүн хөрш зэргэлдээ Орхон, Дархан-Уул аймгуудын зах зээлд борлогдож байгаа нь мал хулгайлах гэмт хэргийн гаралт өсөх нөхцлийг бүрдүүлж байна гэсэн дүгнэлтүүдийг тодорхой жишээ баримт дээр тулгуурлан ярьж хэлэлцүүлсэн байна.

Улмаар эрүүгийн хэрэг бүртгэлт, мөрдөн байцаалтын ажиллагаа явуулсан 548 хэргээс 128 хэргийг шүүхэд шилжүүлсэн нь өмнөх оноос 15 буюу 13,2 хувиар, 203 хэргийг хэрэгсэхгүй болгосон нь өмнөх оноос 22 буюу 12,1 хувиар, 82 хэргийг түдгэлзүүлсэн нь өмнөх оноос 40 буюу 95,2 хувиар тус тус өссөн  дүнг  танилцуулаад уг зөвөлгөөнаас гарах зөвлөмжинд дараах саналуудыг тавьж тусгуулсан байна.

Үүнд:

Өмчийн эсрэг гэмт хэрэг, үүнээс мал хулгайлах гэмт хэргийн гаралт огцом өсөж буйд дүгнэлт хийж, оногдуулж  буй ялын бодлогыг чангатгах, зарим хэргүүдийг гэмт хэрэг гарсан орон нутагт нь шүүх хурлыг хийж байх.

Эрүүгийн байцаан шийтгэх хуулийн 59-р зүйлийн 59.5 дахь заалтыг хэрэгжүүлэх үүднээс жижүүрийн шүүгч ажиллуулах /нэн ялангуяа амралтын болон баяр ёслолын үеэр/

Прокурор чиг үүргийнхээ дагуу хэрэг бүртгэлт мөрдөн байцаалтын ажиллагаанд тасралтгүй, зэрэгцэн хяналт тавих үүднээс долоо хоногийн ажлын нэг өдрийг Цагдаагийн газар дээр ажиллаж, мэргэжлийн удирдлагаар хангах /нэг цонхоор үйлчлэх/

Эд хөрөнгийн үнэлгээг хийх эрх бүхий субьектүүдийг тухайн сум, орон нутагт нь бий болгож, ажиллуулах зэрэг саналууд дэмжигдэж 2014 оны үйл ажиллагаанд мөрдөх зөвлөмжид тусгагджээ.