Шинээр баригдаж байгаа төдийгүй ашиглалтанд ороод удаагүй байгаа орон сууцнуудын метр квадрат зөрж байгаатай холбоотой гомдол саналууд хүрээгээ тэлж байгаа билээ.

Үүний дагуу ШӨХТГ ч нэлээн хэдэн байгууллагуудад албан шаардлага хүргүүлээд байгаа. Гэвч иргэдийн хохирлыг барагдуулсан, зөрчлөө хүлээн зөвшөөрсөн барилгын компаниуд хуруу дарам цөөхөн байгаа юм.

Юутай ч иргэд  барилгын компаниудад дор хаяж 2-20 метр квадратаар “молигодуулж” байсан нь тогтоогдсон. Тиймээс байр худалдан авагчид маань эд хөрөнгөндөө эзэн болж метр квадратын асуудалд ч  анхаарлаа  хандуулсаар байгаа юм.

Метр квадрат тутам нь хамгийн хямд компаниуд л гэхэд иргэдэд 2-15 метр квадрат талбайг зөрүүтэй зардаг байсан бол Зайсангийн орчмын айлуудын байрнаас бүр 15-20 метр квадратын зөрүү гарсан байдаг.

Ямартаа ч иргэдийн ирсэн гомдлын дагуу ШӨХТГ ажиллаж байгаа бөгөөд хэрэв улсын комисс хүлээж авсан байранд удаа дараа дээрх зөрчил илэрвэл тухайн байцаагчид хариуцлага тооцхоо ч хэлээд байгаа юм.

Өчигдөр манай сурвалжлах баг  ШӨХТГ-ын албан хаагчидтай  Баянзүрх дүүргийн II хорооны нутаг дэвсгэрт байрлах иргэн Ц. Сүрэнцэцэгийн таван давхар орон сууцанд очсон юм. Учир нь тус байрны  иргэд байрныхаа метр квадратыг хэмжүүлэхэд, уг хэмжилтээр нэг айл өрхөөс 5-9 метр квадрат дутсан байна. Иймээс байрны оршин суугчид метр квадратын асуудлаар ШӨХТГ-т хандсан нь энэ ажээ.

 Тиймээс ШӨХТГ-аас иргэн Ц. Сүрэнцэцэгийн таван давхар орон сууцны иргэдтэй уулзаж, метр квадратын асуудлыг ярилцсан юм.  Уг байрны иргэд ШӨХТГ-аас байрны метр квадратын зөрүүг хурдан шийдвэрлэж иргэдийн хохиролыг барагдуулахыг хүссэн бөгөөд  ШӨХТГ-аас маргааш хөндлөнгийн байгууллагаар байрны мерт квадратыг дахин хэмжүүлж, метр квадратын зөрүүг бодитоор гаргах үүргийг иргэн Ц.Сүрэнцэцэгт өгсөн юм. Уг хэмжилтийн мөнгийг иргэдээс гаргахгүйгээр иргэн Ц.Сүрэнцэцэгээс гаргахаар болсон. Мөн иргэн Ц.Сүрэнцэцэг метр квадратын хэмжүүлсний дараа иргэдийн хохиролыг 50 хувийг барагдуулахаа мэдэгдсэн юм. Харин оршин суугчид эсэргүүцэж хохиролыг 100 хувь барагдуулахыг шаардаж байлаа.

Харин иргэн Ц.Сүрэнцэцэг оршин суугчидтай уулзаж байхдаа “би та нарын хохирлыг чадлынхаа хэмжээнд барагдуулна. Та нар нададтай тохиролцоонд хүрэхгүй гэж байгаа бол өөр газар хандаж болно. Манай байрны гүйцэтгэл сайн болсон байгаа. Харин метр квадрат дээр асуудал гарсан. Бид дараа дараагийн барилга ажил дээр сайн анхаарч ажиллана” гэдгээ хэлсэн   юм. Харин оршин суугчид их л бухимдаж, хууль хяналтын газарт хандахаа мэдэгдэв. Мөн бид байрны метр квадратын дутуугаас  болж банканд илүү хүү төлж байгаа гэдгээ ч хэлсэн юм.

Энэхүү байр өнгөрсөн аравдугаар сард ашиглалт оржээ. Одоогоор 36 айл өрх амьдарч байгаа юм байна.
                            Ч.Батбаатар: 50 компани метр квадратын зөрүү гаргаснаас 3 компани иргэдэд их хэмжээний хохирол учруулсан

ШӨХТГ-ын хэрэглэгчийн эрх ашгийг хамгаалах хэлтсийн дарга Ч.Батбаатараас дараах зүйлийг тодрууллаа.

-Танайхаас орон сууцны метр квадратад  шалгалт хийж байгаа. Иргэдээс метр квадратын асуудлаар гомдол хэр ирж байна вэ?  
-Одоогийн байдлаар метр квадратын  асуудлаар 500 орчин иргэд өргөдөл гомдол гаргасан байгаа. Эдгээрийн хохиролын хэмжээ 2.1 тэрбум хүрээд байна. Үүнээс 500 сая төгрөгийн хохиролын хэмжээг барагдуулсан. Харин иргэн Ц.Сүрэнцэцэгийн барьсан барилгын асуудлаар 36 өргөдөл гомдол ирсэн. Энэ байрны нэг өрхөөс 5-9 метр квадратын зөрүү гарсан байгаа.

-Мерт квдарт  дутсан тохиолдол ямар арга хэмжээ авч байгаа вэ?
-Хохиролыг барагдуулах хугацаатай шаардлагыг өгсөн. Гэвч хохиролыг заасан хугацаанд нь барагдуулаагүй учраас 10 сая төргөгийн  торгууль ногдуулсан байгаа. Мөн дахин мерт квдарт дээр хэмжилт хийлгэж, баталгаажуулахаар болсон. 

-Дахин хэмжилт хийлгэхээр болсон гэсэн. Хэрэв метр квдарт дутсан батлагдвал ямар арга хэмжээ авах вэ?  
-Иргэн Ц.Сүрэнцэцэг 50 хувийг төлөхөө мэдэгдсэн. Харин оршин суугч хүлээн зөвөөшөөрөхгүй байгаа. Энэ байрны зөрүү дээр 2-3 сая төгрөгийн асуудал яригдаж байна. Мөн оршин суугчид бүгд банкны зээлтэй  учраас асуудал их байгаа. Бид иргэн Ц.Сүрэнцэцэг тохиролцож маргааш бүх байранд  хэмжилт хийхээр болсон. Хэмжилтийн нэгдсэн дүгнэлт ирэх гурав дахь өдөр  гаргана. Дүгнэлтийг гарсаны дараа  асуудлыг шийдвэрлэнэ.

-Одоогоор метр зөрүүгийн асуудалтай компани хэд байгаа вэ?
- 50 компани дээр өргөдөл ирсэн байгаа. Эдгээр гурван компани иргэдэд их хэмжээний хохирол учруулсан байгаа. Тухайлбал, “Тайгам Алтай”, “Тиктоник”, “Эмби топ” зэрэг компаниуд их хэмжээний хохирол учруулсан байгаа. Бусад компаниуд тодорхой хэмжээнд  хохиролоо барагдуулсан байгаа.