Өвөрхангай аймгийн Хархорин дахь сум дундын прокурорын газрын МШАТХХ хяналтын прокурор Д.Бат-Өлзий, Т.Батжаргал, ЯЭАТХХ хяналтын прокурор Ч.Энхжаргал  нар тус аймгийн Хужирт, Бат-Өлзий суманд энэ сарын 20-ноос 22-ны өдрүүдэд ажиллаж, сумдын хэрэг бүртгэгч, мөрдөн байцаагч нараас гэмт хэргийн талаарх гомдол  мэдээллийг хүлээн авах, бүртгэх, шалгах, эрүүгийн хэрэг үүсгэх, хэрэг бүртгэлт мөрдөн байцаалт явуулахдаа ЭБШХ-ын холбогдох заалтуудыг хэрхэн хэрэгжүүлж байгааг болон захиргааны журмаар хураагдсан эд зүйлийг шийдвэрлэх ажиллагаа хууль журмын дагуу явагдаж  байгаа мөн “Хужирт” рашаан сувилал болон сумдын гэмт хэргээс урьдчилан сэргийлэх салбар зөвлөлөөс  урьдчилан сэргийлэх чиглэлээр зохиож байгаа ажил, үр дүнг тус тус шалгасан байна.

Түүнчлэн Прокурорын байгууллагын үйл ажиллагааг олон нийтэд хүргэх, гэмт хэргээс урьдчилан сэргийлэх ажлыг эрчимжүүлэх, тодорхой шатанд гаргах зорилгоор сумдын ард иргэдтэй уулзаж, Эрүүгийн нөхцөл байдлын талаар мэдээлэл хийж, прокурорын газраас  2013 онд хийсэн ажлаа тайлагнан, тэдний санал хүсэлтийг сонсож, газар дээр нь шийдвэрлэж ажилласан байна

Ялангуяа тухайн  сумдад ихээр үйлдэгдэж буй Ойн тухай хууль тогтоомж зөрчих гэмт хэрэг гарах болсон шалтгаан, нөхцөл, үүнээс урьдчилан сэргийлэх талаар зөвлөгөө өгч, байгаль орчноо хамгаалах талаар тэмцэж, гэмт хэргээс урьдчилан сэргийлэх ажлын хүрээнд иргэн бүр өөрийн тодорхой хувь нэмрээ оруулж, гэмт хэрэг гарсан үед нуун дарагдуулах биш, тухай бүр нь холбогдох газарт нь хэлж хууль хяналтын байгууллагуудтайгаа хамтарч ажиллахыг уриалжээ.

Прокурорууд тус тусын чиглэлээр хийсэн шалгалтын дүнг прокуроруудын зөвлөлгөөнөөр хэлэлцүүлж илэрсэн зөрчил дутагдлыг арилгуулахаар мэдэгдэл, шаардлага бичиж холбогдох албан тушаалтнуудад хүргүүлж ажилласан байна.

Д.Ундрах /24tsag.mn/