2013 оноос хойш бага насны хүүхдүүдийг залилж, гэрт нь орж үнэт эдлэл, үнэ хүрэх бүхий л зүйлийг нь хулгайлдаг байсан эмэгтэйг Баянгол дүүргийн цагдаагийн нэгдүгээр хэлтэс илрүүллээ. Тодруулбал, 2013 оноос хойш уг эмэгтэй нийслэлийн зургаан дүүргээр явж, 20 удаа хүүхэд залилж, гэрээс нь үнэт эдлэлүүдийг нь хулгайлжээ. Ингэхдээ янз бүрийн аргаар гэртээ ганцаараа байгаа хүүхдүүдийг залилдаг байсан нь шалгалтаар тогтоогдсон байна. Тухайлбал, "Т-ARA" хамтлагийн тоглолтонд зориулж хүүхдүүдийн дунд уран зургийн уралдаан зарласан. Тиймээс миний дүү уралдаанд оролцчих. Эгч нь чамд туслая хэмээн гэрт нь дагуулж орж, ээж аавынх нь үнэт зүйлийг хулгайлдаг байжээ.

Эл эмэгтэй өдгөө 19 настай бөгөөд 1 ой 2 сартай хүүхэдтэй, мөн  5 сартай жирэмсэн юм байна. Тиймээс жирэмсэн хүн цагдан хорьж болохгүй учир гадуур байцааж байгаа аж. Түүний иргэдийг хохироосон хохирлын хэмжээг одоогоор гаргаагүй байгаа ч урьдчилсан байдлаар их хэмжээний мөнгөн дүн гарч байгааг холбогдох албаныхан онцолж байна.
Юутай ч хэргийг хариуцсан байцаагчтай уулзахаар бид Баянгол дүүргийн цагдаагийн нэгдүгээр хэлтсийг зорьсон юм. Ингээд мөрдөн байцаагч, цагдаагийн ахлах дэслэгч Д.Нямрагчаатай уулзаж хэргийн талаар тодруулахад “Иргэн У гэгч эмэгтэй нэг жил гаруйн хугацаанд бага насны хүүхдүүдийг хуурч мэхлэн, гэрт нь орж эд зүйлийг нь хулгайлдаг байсныг Баянгол дүүргийн цагдаагийн нэгдүгээр хэлтсийн албан хаагчид илрүүлэн шалгаж байна. Тухайн эмэгтэйн хувьд зургаан дүүрэгт гэмт үйлдлээ хийсэн бол одоогоор 20 үйлдэлтэй нь тогтоогдсон. Тиймээс иргэдийг бага насны хүүхдээ гэрт нь ганцааранг орхихгүй байхыг анхааруулж байна. Мөн эл хэрэгт хохирсон байж болзошгүй иргэд манай хэлтэст хандах хэрэгтэй. Энэ эмэгтэйн хувьд алт мөнгөн эдлэл, хөөрөг зэрэг үнэтэй эдлэлийг хулгайлдаг байсан” гэв. Мөн энэ хэргийн ард захиалагч байхыг үгүйсгэхгүй учир цагдаагийн байгууллагаас шалгаж байгаа аж.
    Энэ үеэр сэжигтэн У гэгчтэй  уулзаж, хэрэг явдлын талаар тодруулах гэсэн боловч тэрбээр тоймтой зүйл хэлсэнгүй.  Гэвч түүнээс хэдэн зүйлийг тодруулж чадсан юм.

-Ямар учраас энэ хэргийг үйлдэх болсон бэ?

-Би ийм хэрэг яагаад хийх болсоноо өөрөө ч мэдэхгүй байна

-Хэзээнээс хэргийг үйлдэж эхэлсэн бэ?

-Өнгөрсөн жилээс хойш үйлдсэн

-Чамайг хэн нэгэн дарамталж энэ зүйлийг хийлгэсэн юм уу?
- Надад ямар нэг гадны дарамт байхгүй. Би өөрөө л хийсэн.

-Тэгвэл ар гэрийн ядуу, зүдүү байдал нөлөөлсөн юм уу?

-Ар гэрийн гачигдлаас болж ч ийм хэрэг үйлдээгүй

-Хулгайлсан зүйлээ хаана өгдөг байсэн бэ?

-Хулгайлсан эд зүйлээ "Нарантуул" зах дээр очиж борлуулдаг байсан

-Ихэвчлэн ямар зүйл хулгайлдаг байв?

-Ээмэг, бөгж авдаг байсан
Тэрбээр ийм тайлбарыг өглөө. Юутай ч энэ эмэгтэй жирэмсэн учир цагдан хорих боломжгүй байна. Тиймээс дахин ийм төрлийн хэргийн золиос болохвий гэдэг үүднээс сэрэмжтэй байхыг ард иргэддээ цагдаагийн байгууллагаас анхааруулж байна.

Сэрэмжлүүлэг болгох үүднээс тус эмэгтэйн зургийг олон нийтэд ил гаргаж байна.
Дашрамд хэлэхэд,  эл эмэгтэй нь  хөгжлийн бэрхшээлтэй иргэн бөгөөд төрөлхийн нэг гар нь богино юм байна.