Монголын хип хоп хөгжмийн ертөнцөд үндэсний хэв маягийг шингээсэн уран бүтээлээрээ ялгарч буй “Загасан ширээт тамга” хамтлагийн анхны бие даасан  цомог хэвлэлтээс иржээ. Хамтлагийн залуус өнөөдөр энэ талаар мэдээлэл хийсэн бөгөөд “Ширээт гал” цомгийн нээлт тун удахгүй болох гэж байгааг ч дуулгалаа.

Энэ үеэр хамтлагийн гишүүн Г.Одсайхан "Манай хамтлаг монгол хүн ямар байх ёстойг уран бүтээлдээ тусгадаг. Түүгээрээ дамжуулан хүүхэд залууст үндэсний урлаг, ёс заншилаа танин мэдэж бишрэн дээдлэх үзлийг шингээхийг гол болгодог.  Бид өнөөдрийг хүртэл энэ замаасаа хазайхгүй, урвахгүй, ухрахгүй явж байна" гэв.

“Ширээт гал” цомог нийт 11 дуутай бөгөөд цомогт хамтлагийн өнөөдрийг хүртэл туурвисан үндэсний хэв шинжтэй дуунуудаас гадна Тува, Буриад, Халимаг, Хазаар зэрэг Монгол үндэстнүүдийн дуу хуур багтжээ.
 
Сонирхуулахад “Загасан ширээт тамга” хамтлаг 2009 онд байгуулагдсан цагаасаа эхлэн хөөмий, хархираа, исгэрээ зэргийг уран бүтээлдээ ашиглаж ирсэн байна.

Ингээд тус хамтлагийн уран бүтээлээс "Еки Аттар" дууны клипийг та бүхэнд хүргье.