Монгол Улсын гавьяат тамирчин Н.Төгсцогт мэргэжлийн бокст хүч үзэхээр болсон гэх мэдээлэл олон нийтийн мэдээллийн хэрэгслээр цацагдсан. Үүнийг нь сонссон ард түмэн Рио Де Жанерогийн олимпоос алтан медаль авах магадлалтай тамирчингаа мэргэжлийн спортод алдлаа гэж ихээхэн харамсаж суусан. Тэгвэл гавьяат маань өөрийн биеэр энэ асуудалд хариулт өгчээ. Тэрээр “Ер нь мэргэжлийн бокст тоглох бодолтой байгаа. Гэхдээ ирэх олимп, дэлхийн аваргын циклийг дуусгахаар энэ асуудлыг бодож үзэхээр шийдвэрлэсэн. Одоогийн байдлаар сонирхогчдын боксоо орхино гэсэн зүйл алга. Юуны өмнө олимп, дэлхийн аваргад амжилт гарах хэрэгтэй байна” гэж хэллээ. Ямартай ч Н.Төгсцогт гавьяат маань хоёр жилийн дараа болох Риогийн олимп, Катарт болох дэлхийн аваргад эх орноо төлөөлөн оролцох ажээ. Хэдийгээр 22 настай ч гэсэн тэрээр яах аргагүй дэлхийн хэмжээний боксчин билээ.