Өнгөрсөн шөнө аваргуудын лигийн шөвгийн найман багуудын эхний хоёр тоглолт явагдлаа. Шилдэг наймд шалгарсан Английн хоёр клубын нэг “Манчестер Юнайтед” өөрийн Олд Трафорддоо Германы “Бавари Мюнхен”-ийг хүлээн авч эхний тулаанаа хийсэн юм.

Тоглолтын анхны аюултай довтолгоог “Бавари” хийсэн бөгөөд Робины цохилт хаалганы хажуугаар өнгөрсөн. Үүний дараа гэмтэлтэй ван Персиг орлож талбайд гарсан Дани Уэлбек хоёр ч удаа гоол байж болох цохилтыг “Мюнхен”-ы хаалга руу хийгээд амжсан. Тоглолтын эхний үед ийнхүү хоёр баг гоол оруулж чадсангүй 0:0-ээр дууслаа.

Тоглолтын хоёрдугаар үе эхлээд 52 дахь минутад Рүүни Фил Жонс-оос эхэлсэн довтолгооны төгсгөлийг хийж хаалга руу цохисон бөмбөгийг хаалгач барьж авсан. Гэхдээ талбайн эзэд 57 дахь хоромд булангийн цохилт гүйцэтгэх эрхтэй боллоо, цохилтыг Рүүний хийсэн бөгөөд төвд хамгаалагчдын алдааг ашиглан  ганцаараа гүйж байсан багийн ахлагч Видич шууд мөргөж, гоолын салхийг хагалав.  “Юнайтед” гэртээ 1:0-ээр тэргүүлээд эхэллээ.Хожигдож яваа “Бавари” 65 дахь минутад тоог тэнцүүлсэн бөгөөд баруун жигүүрээс дээгүүр өгсөн дамжуулалтыг Манжукич толгойгоор мөргөж Швайнштайгер руу дамжуулсан бөгөөд Герман залуу боломжийг алдалгүй ашиглаж зүүн хөлөөрөө шууд хаалга руу цохиж гоолдсон юм.

Хоёр багийн тоглолтод ахиж гоол орсонгүй 1:1-ээр ийн өндөрлөв. 1:1 гэсэн үр дүн бол “Бавари”-д ашигтай “Манчестер” дараагийн даваанд үлдэхийн тулд айлын талбайд нэг гоолын илүүтэй ялалт авах хэрэгтэй. Тоглолтын 90 дэх минутад Швайнштайгер хоёр дахь шараа хүртэж улаан хуудас авч талбайг орхисон.