Завхан аймгийн Тэлмэн сум адуугаар аймагтаа тэргүүлж  2013 оны мал тооллогоор түмэн адуу /10 мянган / тоолуулсан байна. Энэхүү бахархам амжилтаа ирэх зургадугаар сарын 30-наас 7 сарын 2-ны  хооронд ёслол төгөлдөр тэмдэглэхээр болжээ.

Энэхүү арга хэмжээг Тэлмэн сумын ИТХ, ЗДТГ-аас зохион байгуулахаар бэлтгэл ажилдаа орсон байна.  Баяр наадмын үеэр Завхан аймгийн бүх сумдын  оролцсон “Адуучин тэмцээн” , “Гоёмсог морьтон хос” шалгаруулах зэрэг олон үйл ажиллагааг төлөвлөн бэлтгэл ажлаа хангаж байгаа гэнэ. Тэлмэн сумын “Хүрэн тал” -д   2009 онд “Очирваань хурд” баруун бүсийн даншиг наадам  зохион байгуулагдсан ба  Завхан аймагтаа морь  уралдуулахад  зай,  газрын хөрс  нь   тохиромжтой бартаа саадгүй  тал билээ.“Хүрэн тал”-д 6 сарын  28, 29-ний өдрүүдэд  “түмэн” адуугаа хурааж 6 сарын 30-ний өдөр баяр наадмын үйл ажиллагаа  нээнэ.  

Тэлмэн сумаас  МУ-ын Алдарт уяач Э.Ганбат, Аймгйин алдарт уяач “Аварга хээр”-ийн  М.Насанбат, Ч.Товуухорол, О.Нямсүрэн, Н.Лхагваа, Энхболд, Ү.Намнан, А.Чулуунтогтох, Г.Баттүшиг, Р.Мягмарсүрэн зэрэг олон уяачдын  морьд  улс, аймаг, бүсийн наадмуудад  айраг түрүү авч байсан юм.Тэлмэн сум нь хангай, тал хээр хосолсон   адуун сүрэг өсөхөд  тохиромжтой нутаг төдийгүй жил бүрийн намар өвөл  малчид хамтран  отор хийж адуундаа  сэтгэл зүрхээ зориулсан ажилладаг ард түмэн учир энэхүү амжилтанд хүрсэн нь илт юм.