Чингэлтэй дүүрэгт баригдаж буй "Макс" грүппийн барилгаас төмөр унаж, машинтайгаа замын хөдөлгөөнд оролцож байсан залуугийн амийг авч одсон. Энэ хэрэгт тус компанийн холбогдох ажилтнуудыг татаж Чингэлтэй дүүргийн цагдаагийн нэгдүгээр хэлтэст эрүү хэрэг үүсгэн шалгаж байгаа. Тэгвэл энэ хэргийн дуулиан намжаагүй байхад өнгөрсөн амралтын өдрөөр дахин замын хөдөлгөөнд оролцож байсан автомашин дээрээс төмөр унасан хэрэг гарсан.
Тодруулбал, Сүхбаатар дүүргийн 1 дүгээр хорооны нутагт, ЭМЯ-ны баруун талд "Аюут" ХХК-ийн захиалгаар баригдаж байгаа 16 давхар барилгын 15 давхараас төмөр унаж, тэнд явж байсан "Тоёото приус" маркийн машиныг цохиж гэмтээсэн вм. Аз болж хүний амь хохироогүй өнгөрчээ. Гэвч дахин дахин баригдаж байгаа барилгаас төмөр унаад байвал хэрхэх вэ гэдэг асуудал гарч ирж байгаа юм. Юутай ч тухайн 16 давхар барилгаас төмөр унасан асуудалд иргэн гомдолтой байгаа учир цагдаагийн байгууллагад ханджээ. Улмаар Сүхбаатар дүүргийн цагдаагийн нэгдүгээр хэлтэс шалгаж эхэлсэн байна. Харин бид тухайн барилгыг зорьж барилгын ажлыг гүйцэтгэж байгаа компанийн холбогдох албаныхантай уулзах гэсэн боловч эзэнгүй байв. Мөн эл барилгын ажил зогсонги байдалтай байгааг жижүүр нь хэлж байлаа. Гэвч яг ямар компани гүйцэтгэгчээр нь ажиллаж байгаа нууцалсан юм.
Юутай ч 15 давхараас нь 3 метр урт зүйл унасан барилга бол энэ.
Юутай ч 15 давхараас нь 3 метр урт зүйл унасан барилга бол энэ.
Дулааны улирал эхлэхээр барилгын ажлууд ид явагдаж эхэлдэг. Тэгвэл энэ үеэр барилгын компаниуд хэдэн хүний амиар тахилга барих бол гэж иргэд бухимдаж байна. Хүний амь нас эрсдээгүй гээд энэ хэргийг зүгээр өнгөрөөж яавч болохгүй. Ийм төрлийн хөдөлмөр аюулгүй байдлыг хангаж ажлаагүй хэрэгт хүлээх хариуцлагыг ч өндөрсгөх хэрэгтэй юм. Түүнчлэн захиалагч компанийн хөдөлмөрийн аюулгүй байдлыг хангуулж ажиллаж байгаа эсэхэд байнга хяналт тавих үүрэгтэй байдаг гэдгийг албаныхан онцолж байна.
Д.Ундрах /24tsag.mn/
Сэтгэгдэл (2)