“Шүүдэр” продакшн хоёр дахь киноны ажилдаа орж Б.Шүүдэрцэцэгийн “Улаан пальто” өгүүллэгийг сонгожээ.  Долоон жилийн өмнө анх “Сэтгэлийн анир” номд орсон энэ өгүүллэгт зургаан настай Номин охин урьд насны амьдралаа, аав ээжээ тод санаж байдгийг хөрш айлын оюутан бүсгүй ажиглаж, охины сэтгэлийг амраахаар хуучин гэр рүү нь хүртэл хамт очдог.

“Шүүдэр” продакшны 2 дахь киног “Ард даатгал”, “Benetton”, “М oil”, “Broadway” сүлжээ ресторан, “Чоно Finans”, “Өгөөж хишиг” компаниуд ивээн тэтгэж, “Райн лифт Монголиа”, “Алиман сар”, “Говь” компани, “ Baagii S Bag” зэрэг компани дэмжиж байгаа аж.

 Хүний сүнс дараагийн төрөлдөө эргэн төрдөгт  Бурханы шашинт  дорныхон  илүү итгэдэг. Эх үрийн нандин холбоо, хүний урьд өмнөх төрлийн тухай сонирхолтой сэдвийг хөндсөн  уянгын драмын төрлийн энэ бүтээлийн гол дүрд  МУСТА О.Долгор, Т.Өөдөө, жүжигчин, загвар өмсөгч О.Байгаль нар тоглож байгаа ажээ. Нэгэн үе бараг кино бүхэнд уригдаж, жүжигчин Ч.Ундралын хамт дуулан шуугиулж явсан жүжигчин Т.Өөдөө, өнөөгийн дэлгэцийн од болон гялалзаж буй О.Долгор хоёрыг нэгэн уран бүтээлд нэгтгэж, “Газар шороо”, “Догшин хутагтын сахиус” зэрэг томоохон кинонд тоглоод 16 жил завсарласан жүжигчин О.Байгалийг  тоглуулж байгаагаараа “Улаан пальто” сонирхолтой юм. УИХ-ын гишүүн, Монгол Улсын сайд Ч.Сайханбилэгийн гэргий, “Байгаль beauty” салоны захирал О.Байгаль ерээд онд Хүүхэд залуучуудын театрын жүжигчин байсан билээ.

Уншигчдын  хувьд “Улаан пальто” өгүүллэгийн баатар Номин охин урьд насны ээжтэйгээ уулзах эсэх нь хамгийн сонирхол татаж байгаа ажээ. Уг киноны Номин охин болон түүний урьд нас Саяанагийн дүрд 23-р сургуулийн сурагч Ч.Энхнамуун жүжигчдээс дутуугүй чадварлаг тоглож байгаа гэнэ.

Гэр бүлээрээ театрт очоод хүүхдүүдтэйгээ хамт үзчихээр сэдэвтэй кино  өдрийн од шиг ховордсон энэ үед Хүүхдийн баярын босгон дээр нээгдэх “Улаан пальто” ээжийгээ хайрлах, хүнлэг энэрэнгүй сэтгэлийн сайхныг  дэлгэцийн хүүрнэх  гэгээлэг бүтээл болно хэмээн уран бүтээлчид нь үзэж байгаа аж.