Японы судлаач, доктор Чой Жеффи Монголын бодлого боловсруулагчид төсвийн хөрөнгийг тэргүүлэх салбарт зарцуулахгүй, харин үр ашиг багатай салбарт хэтрүүлэн зарцуулж байна гэж дүгнэжээ. Манай улсад эрчимтэй хөгжиж байгаа Өмнөговь, Дархан, Эрдэнэт, Улаанбаатар хот гэсэн гол бүсүүд байгаа. Энэ бүсэд хөрөнгө оруулалтыг төвлөрүүлэх хэрэгтэй гэж үзэж байна. Ялангуяа Улаанбаатар хотын зам, эрчим хүч, барилга зэрэг дэд бүтцийн тэргүүлэх чиглэлд зарцуулж байгаа хөрөнгө хангалтгүй байгаа гэнэ. Харин жижиг бүсүүдийг дэмжих төсөлд хөрөнгө оруулалт их хийгдэж байна гэж дүгнэжээ.
2012 онд Хөгжлийн банкнаас 580 сая долларын зээл авсан нь Засгийн газрын нийт төсвийн тал хувь, дотоодын нийт бүтээгдэхүүний 6 хувьтай тэнцэж байна. Энэ нь их хэмжээний өр болж, эрсдэлийг бий болгосон. Мөн 150 сая долларыг зөвхөн замын салбарт зарцуулсан нь олон нийтэд төдийлөн ач холбогдолтой төсөл биш. Мөн хөдөөд зам тавих, Эрдэнэс тавантолгой компанийн дотоод зардлыг төрөөс гаргаж байгаа нь орлого бүтээхгүй салбарт, ашиггүй хөрөнгө оруулж байна гэлээ. Энэ мэтчлэн төсвийн хөрөнгийг оновчтой зарцуулж чадаагүйгээс гадна санхүүжилт өгөх салбарт нарийвчилсан судалгаа, төлөвлөгөө дутаж байна. Төсвийн зарцуулалтаас гадна Монгол хүнийг хөгжүүлэх бодлого байхгүй байгаа нь хөгжилд саад болж байгаа гол асуудал гэж Японы судлаач онцоллоо.
