ОХУ-ын алдарт дуучин, хөгжимчин, “Секрет” хамтлагийн үүсгэн байгуулагч Максим Леонидов өөрийн хамтлагтайгаа манай улсад тун удахгүй ирэх гэж байна.

“Секрет” хамтлаг нь Монголд 1987 онд Монгол-Зөвлөлтийн найрамдлын нийгэмлэгийн шугамаар хүрэлцэн ирж хуучнаар ДСНК болон Залуучуудын соёлын төв ордонд хоёр удаа тоглолт хийж байжээ. Энэ удаа тус хамтлагийн дуучин Максим Леонидов өөрийн “Hippoband” хамтлагтайгаа “Back in Mongolia” тоглолтоо толилуулах юм.

Тэрбээр Монголд долоо хоног айлчлах хугацаандаа Жуковын хөшөөнд цэцэг өргөх, Дундговь аймгаар аялах, клипний зураг авах төлөвлөгөөтэй байгаа аж.

Тоглолт ирэх сарын 10-нд Улаанбаатар паласын концертын их танхимд болно. Тоглолтын тасалбар нь 30, 50, 80 мянган төгрөгийн үнэтэй байх юм.

Гадаад төрх, хөгжмийн хэмнэл, аялгуугаараа алдарт Битлз хамтлагийг санагдуулам “Секрет” хамтлаг нь анх 1985 онд байгуулагдсан цагаасаа эхлэн тухайн үеийн ЗХУ-ын рок попын ертөнцөд тэсрэлт хийж, 1987 онд “Секрет”, 1989 онд “Ленинградын цаг үе” цомгоороо их амжилтад хүрчээ. Тэдний “Тысяча пластинок”, “Алиса”, “Привет”, “Вниз по течению”, “Сара Барабу”, “Моя любовь на пятом этаже” зэрэг хит дуугаар нь манайхан андахгүй. Максим Леонидов хэсэг хугацаанд Израйльд амьдрах болсноор тус хамтлагийн уран бүтээл завсардсан ч, удалгүй Орос оронд эргэн ирж хамтлагтайгаа нийлэн цэнгэлдэх хүрээлэн дүүрэн үзэгч цуглуулан тоглолт хийсээр байгаа юм. Түүнчлэн 1996 онд өөрийн “Hippoband” хамтлагийг байгуулан “Секрет”-ийн дуунууд болон өөрийн зохиосон дуугаа үзэгчдэд толилуулдаг болсон нь амжилт дагуулж байгаа юм.

Өдгөө Максим Леонидов нь рок хөгжимчин төдийгүй жүжигчин, яруу найрагч, телевизийн хөтлөгч гэдгээрээ алдартай.