Монгол Улсын Ерөнхийлөгчийн “Морин хуураа дээдлэн дэлгэрүүлэх тухай” зарлигийг хэрэгжүүлэх ажлын хүрээнд Морин хуурын олон улсын IV наадам, сонирхогчид, урлаачдын уралдаан энэ сарын 26-наас ирэх сарын 1-ний өдрүүдэд Улаанбаатар хотод зохион байгуулагдах гэж байна.

Тэгвэл тун удахгүй болох гэж байгаа уг уралдаантай холбогдуулж Дэлхийн морин хуурийн холбооны тэргүүн А.Бат-Эрдэнээс цөөн хэдэн асуултанд хариулт авлаа.

-Морин бол яахын аргагүй Монголын язгуур урлаг. Тийм ч утгаараа Монголчууд морин хуураа дээдлэдэг. Мөн урлагийнхан маань морин хуурийг урлаг талаасаа нь аль болох хөгжүүлэхийг эрмэлздэг. Тэгвэл энэ бүхэнд яг юу хэрэгтэй байдаг вэ?
-Морин хуурь сонирхогчдын уралдаанд монгол ардын уртын дуу, татлага  орж байгаа. Энэ нь зөвхөн гадаадууд биш, Монголчууд морин хуур сонирхогчдоороо ардынхаа өв соёлыг уламжилж өвөлж үлдээхэд нэмэртэй болов уу гэж бодож байна.

-Энэ удаагийн сонирхогчдын уралдаанд нийт хэчнээн хүн оролцох вэ. Шүүлтийн тухайд?
-Нийт 70 гаруй хүн оролцоно гэсэн төлөвлөгөөтэй байгаа. Шүүлтийг мэргэжлийн морин хуурч нар шүүнэ.  Шүүх ажиллагааг хоёр шаттайгаа явуулна.

-Орон нутгаас сонирхогчид хэр идэвхтэй хамрагдаж байна?
-Энэ удаагийн уралдаанд ихэвчлэн орон нутгаас ирж оролцож байгаа. Тухайлбал, Өмнөговь, Дундговь, Төваймаг зэрэг газруудаас морин хуур сонирхогч хүүхэд, залуучуудыг өргөн оролцуулахыг зорьж байна Шагналын сангийн хувьд нэгдүгээр байр 1 сая, хоёрдугаар байр 700 мянга, гуравдугаар байр 500 мянган төгрөгний шагналтай.

-Хэдээс хэдэн насныхны дунд зарлагдаж байгаа вэ?
-Насны хязгаар энэ удаад заагаагүй. Оролцох хүсэлтэй хэн ч оролцож болно. Энэ удаагийн уралдааны хөтөлбөрт олон өөрчлөлт орсон байгаа. Өөрөөр хэлбэл, дөрвөн тоглолтыг заавал тогло гэж заасан. Энэ хөгжмийг тоглож чадах болон чадахгүй хүн ч байна шүү дээ. Гадаадаас хүмүүс оролцож байгаа. Герман, Японоос нийлээд 16 хүн сонирхогчдын уралдаанд чадал, чансаагаа сорьё гэж бүртгүүлсэн байгаа.