АНУ-ын NBA-гийн плей-оффын эхний шатны цувралын хоёр дахь тулаанууд явагдаж байна. Ингээд өнөөдөр болсон гурван тоглолтын дэлгэрэнгүйг хүргье.

"Миами Хит" цувралыг 2:0 болголоо

       “Дөлнүүд”-ийн талбайд явагдсан тулаанд “Миами Хит” 107 оноогоор ялалт байгуулж цувралыг 2:0 болголоо. Тоглолтын нэгдүгээр үед "Миами" 10 оноо илүүрхсэн бол хоёрдугаар үед багууд тэнцүүхэн тоглож 28, 28 оноо авсан. Харин гурав, дөрөвдүгээр үед “Шарлотт” тус бүр гурван оноо илүү авсан ч энэ нь ялалт байгуулахад хангалтгүй байв.
Энэ өдөр “Хит”-ээс Л.Жеймс 32 оноо, найман ассист, зургаан самбар авч багаа тэргүүлсэн бол К.Бош 20 оноо, Д.Уейд 15 оноо авчээ.

"Даллас Маверикс" цувралыг тэнцүүллээ

    Эхний тоглолтод ялагдал хүлээгээд байсан “Даллас” тоглолтыг эрч хүчтэй эхлүүлж, олон бөмбөг таслалт хийж оноо давамгайллыг бий болгож  чадлаа. Тэд эхний хагаст таван оноог илүү авсан бол сүүлчийн хоёр үед 16 оноогоор илүүрхэж, эцсийн мөчид 113:92-оор чухал ялалтаа аван цувралыг 1:1 болголоо.
Өнөөдөр “Даллас”-аас М.Эллис 21 оноо, ахмад тоглогч Ш.Марион 20 оноо авч итгэл төгс тоглолтоор багаа тэргүүлсэн байна. Мөн “Герман машин” Новицки 18 оноогоор багтаа тусалжээ.

“Портланд Трейл Блейзерс” 7 онооны зөрүүгээр ялалт байгууллаа

    Тоглолтын нэгдүгээр үед “Хьюстон” найман оноо илүү авсан боловч сүүлийн гурван үед “Портланд” илүүрхэж, эцсийн дүндээ 112:105-аар ялалт байгуулж цувралыг 2:0 болголоо.
Эхний тоглолтод “Портланд”-ын Лиллард, Алдриж гэсэн хослол гайхалтай байж, багтаа ялалт авчирсан бол өнөөдөр Л.Алдриж үнэхээр зогсоогдошгүй байлаа. Тэрбээр өнөөдөр 43 оноо, найман самбар авч багаа ялалтанд хүргэсэн бол Д.Лиллард 18 оноо, 11 оновчтой дамжуулалт, найман самбар авч тун жигд тоглолт үзүүлсэн байна.