Авилгал хээл хахуулийн хор хохиролыг олон нийтэд таниулах зорилготой нэгэн цуврал кино өчигдөр нээлтээ хийлээ. “Ус дээшээ урсдаг” хэмээх өвөрмөц нэртэй энэхүү бүтээлийг Азийн сангаас Монголд хэрэгжүүлж буй “Ил тод байдал сайн засаглалыг бэхжүүлэх” төслийн хүрээнд бүтээжээ.
Энэхүү цувралын зохиолыг дэлхийд алдартай CELTX форматаар зургаан хүнтэй мэргэжлийн баг бичсэн бөгөөд жанрын хувь анги бүрт өөр өөр түүх өгүүлэгдэх, телевизийн цуврал хэлбэрээр бичигдсэнээрээ онцлог.
28 ангитай тус цувралын ерөнхий найруулагчаар ард түмэндээ Арслан нэрээрээ мөнхөрсөн найруулагч Г.Доржсамбуу агсны хүү найруулагч Д.Цогт ажилласан юм. Харин киноны гол дүрүүдэд СТА жүжигчин Б.Болдбаатар, СТА Н.Отгонтогос, залуу жүжигчин Д.Хосбаяр, П.Нямцогт нар тогложээ.
Кино энэ сарын 28-наас эхлэн NTV телевизээр өдөр бүр үзэгчдийн хүртээл болно.
Энэ үеэр бид киноны гол дүрүүдийн нэг Мөнхөөгийн дүрд тоглосон П.Нямцогттой цөөн хором ярилцлаа.-Юуны өмнө тоглосон бүтээл тань нээлтээ хийж байгаад баяр хүргье. Дүрийнхээ тухай ярихгүй юу?
-Энэ киноны Мөнхөө хэмээх цоо шинэхэн дэслэгч залуугийн дүрд тоглосон. Дүрийн тухайд хүн бүр өсөн дэвжихийг хүсдэг шүү дээ. Түүний нэгэн адилаар Цагдаагийн академийн сонсогчоос чадварлаг мөрдөн байцаагч болж байгаа хүний дүр юм. Бид хоёрын нас ойролцоо, ижил төстэй зүйл их байсан нь энэ дүрд тоглоход илүү дөхөм байлаа.
-Энэ кинонд хэрхэн тоглох болов?
-Мэдээж кино пробонд орсон. "Зориг" сангаас энэ кинонд тоглох жүжигчдийн пробыг зарласан байсан. Түүнд нь шалгуулж тэнцсэн.
Баярлалаа.
24tsag.mn
