Ойрноос хамгийн их хэл ам таталж буй Хууль зүйн сайд Х.Тэмүүжиг 98 сая төгрөгөөр хөөрөг авсан хэмээн шуугиж байна. Энэ нь түүнийг огцруулах үндэслэлүүдийн нэг болсон тухай зарим эх сурвалжууд дурдав. Тэгвэл тэрбээр энэ мэдээлэлд няцаалт хийж “Би боловсролтой хүн. Хэрвээ надад тийм хэмжээний мөнгө байлаа гэхэд тэр мөнгөө нэг чулуунд зардаг тэнэг хүн би биш” гэсэн товчхон хариултыг өгсөн юм. Түүний хэлж буйгаар бол боловсролтой хүн  их хэмжээний мөнгөөр хөөрөг худалдаж авдаггүй аж. Харин авсан тохиолдолд тэнэг болж хувирдаг байна. Түүнийхээр чулуунд сая, саяыг зарцуулдаг хүмүүс бол боловсролгүй бөгөөд тэнэг хүмүүс гэсэн үг юм.

Манай улс төр, бизнесийн салбарынханы дунд хоббигоороо хөөрөг цуглуулдаг хүн олон бий. Бас хэдэн зуун саяын хөөргөөр гангардаг нөхдүүд ч байгаа. Тиймээс Х.Тэмүүжин сайдын хэлсэнчлэн олон саяыг чулуунд зарцуулдаг тэнэг, боловсролгүй нөхдүүдийг 24tsag.mn танилцуулж байна.


Тухайлбал парламентын танхимд сууж буй гишүүдээс хамгийн үнэтэй хөөргийг УИХ-ын гишүүн, “Мон Уран” компанийн ерөнхийлөгч Б.Наранхүү барьдаг байна. Түүний хөөрөг  380 сая төгрөгийн үнэтэй бөгөөд  16-17-р зууны үеийн хуучны үнэт эдлэл аж. УИХ-ын гишүүн “Алтай констракшн”-ы захирал Х.Бат-Эрдэнэ ч мөн шүрэн толгойтой, алтан нуухтай их гарын мана хөөрөг барьдаг бөгөөд түүнийнх Дамиран мээрэнгийн эдэлж байсан ховор эд гэсэн. Х.Бат-Эрдэнэтэй адил хөөргийг “Макс” группийн ерөнхийлөгч Д.Ганбаатар хүртэл барьдаг. Эдгээр хөөргүүд чулууныхаа чанар зэргээс шалтгаалан харилцан адилгүй үнэтэй ч дунджаар 100-150 сая төгрөгт хэлбэлцэлздэг аж.
“Би Монголынхоо уламжлалт гар урлал, дархчуудын ур ухаан, шингэсэн бүтээлүүдийг сонирхдог. Заримыг нь цуглуулдаг. Өөрөө ч бас эдэлж хэрэглэдэг. Ер нь монголчуудын урлаж бүтээсэн зүйлд монгол хүний дотоод сэтгэл," ур ухаан, хүсэл тэмүүлэл шингэсэн байдгаас гадна ур хийц нь дахин давтагдашгүй” гэж УИХ-ын гишүүн Б.Бат-Эрдэнэ ярьжээ. Түүнд Манзушир хутагтын барьж байсан хөөрөг бий. Олон хутагтын гар дамжиж, аймаг сум дамжин зарагдаж явсаар энэ хөөрөг 1990 оны эхээр Дархан аваргын гар дээр иржээ. Мөнгө хатуу байх үед энэ хөөргийг Б.Бат-Эрдэнэ чамлахааргүй өндөр үнэ төлж авсан гэдэг.


Хаа явсан газраа хөөрөгнөөс салдаггүй Р.Гончигдорж гишүүнд уран нарийн хийцтэй хаш хөөрөг бий.  Мөн Эдийн засгийн хөгжлийн яамны дэд сайд О.Чулуунбатад эрт үед сүм хийдэд урт удаан суусан хамба лам нарын хөөрөг байдаг аж. Тухайлбал, түүнд Дилав хутагт болон Дондогдулам хатны барьж байсан хөөрөг бий. Ямартай ч Р.Гончигдорж, О.Чулуунбат нарын хөөрөг “Халхын 10 цагаан” нэртэй 10 сайхан хөөргийг тэргүүлж байжээ.


Монголын шилдэг 100 хөөрөгний каталогид Да.Ганболдын хэд, хэдэн хөөрөг багтжээ. Тухайлбал шүрэн толгойтой их гарын тархи манан хөөрөг нь байдаг байна. Тус хөөрөгний дотор тал нь өнгөлгөөтэй. XVIII зууны үеийн хийцтэй. Мөн Их аварга Д.Дагвадоржид Манлай ван Дамдинсүрэнгийн харлаг манан хөөрөг хадгалагдаж байна. Эртний түүхтэй, бас дайчин вангийн эдлэж хэрэглэж байсан эд гэдгээрээ зартай энэ хөөргийг тэрбээр олон жил үе дамжуулан хадгалсан нэгэн буурлаас чамлахааргүй өндөр үнэ төлж байж худалдаж авч байжээ.
Тэрбээр үнэт чулуугаар хийсэн, уран чамин хийцтэй, олны харцыг булааж, шуналыг хөдөлгөсөн нэлээд хэдэн хөөрөгтэй. Түүний цуглуулгад XVII, XVIII зууны үеэс уламжлагдаж ирсэн хоёр шүрэн хөөрөг бий. Харин нөгөө нь XVIII зууны үеийн түүх соёлын дурсгалд хамаарагдах бөгөөд цул шүрийг ухаж, давхар бумба хэлбэртэй хоёр хөөрөг болгоод навч, жимс тэргүүтнээр чимэглэсэн нандин хийцтэй хөөрөг аж. Зоосон тамгатай, эртний хээ угалзан чимэглэлтэй пийсүү хөөрөг ч мөн түүний цуглуулгад байдаг.