Дэлхийн улс орнуудад аж үйлдвэржсэн эринээс мэдээлэлжсэн эринд шилжих үйл явц улам эрчимжин мэдлэгт тулгуурласан нийгмийг цогцлон байгуулж, нийгмийн баялаг, үнэт зүйлсийг бүтээх эх сурвалж нь мэдлэг, мэдээлэл гэдгийг дэлхий нийтээр хүлээн зөвшөөрч, улс төр, эдийн засаг, нийгмийн бүхий л хүрээнд мэдээлэл, харилцаа холбооны технологийг өргөнөөр нэвтрүүлэн хэрэглэж байна. Цахим засаглалыг нээлттэй засаглал гэж энгийнээр нэрлэж болох бөгөөд электрон засгийн газрыг дэлхий дахинд мэдээлэл технологийн тэргүүлэх 30-н чиглэлийн нэг гэж үздэг бөгөөд Нэгдсэн үндэстний байгууллагаас жил бүр дэлхийн улсуудыг хамарсан цахим засаглалын индексийн судалгааг гаргадаг. Манай орны хувьд цахим засаглалын хөгжил ямар түвшинд явж байгааг судалгаагаар гаргахыг зорилоо.

Мэдээлэл харилцаа холбооны технологи нь өнөөгийн дэлхий дахины бүх салбарын хөгжлийн чиг хандлагыг тодорхойлогч хүчин зүйл, улс орнуудын нийгэм эдийн засгийн хөгжлийн хурдасгуур хүний хөгжил, эрх, эрх чөлөөг хангах баталгаажуулах хэрэгсэл болж байна.

Энэ салбарын хөгжил, гүйцэтгэх үүрэг ач холбогдлын талаар дэлхий нийтээр хүлээн зөвшөөрч Нэгдсэн үндэсний байгууллагаас анхаарч  улс орон бүр мэдээлэл харилцаа холбооны технологийг хөгжүүлэх талаар төрийн бодлогоо тодорхойлох тус салбарын тогтолцоог боловсронгуй болгохыг улс орнуудын төр засагт уриалсан байдаг. Монгол Улсын  хувьд засгийн газрын үйл ажиллагааны хөтөлбөрт  2003  онд  “Цахим монгол хөтөлбөр боловсруулж хэрэгжүүлэх”  тухай заасан бөгөөд түүний нэг бүрэлдэхүүн хэсэг нь цахим засаглалыг бий болгох юм. Нээлттэй засаглалыг төрийн үйлчилгээг иргэдэд ойртуулах, боловсронгуй болгох, үйлчилгээний үр өгөөмж хүртээмжийг дээшлүүлэх ил тод байдлыг хангаж, төрийн үйл ажиллагаанд иргэдийн оролцох оролцоог нэмэгдүүлэх гол хүчин зүйл гэж тодорхойлдог.

Уг судалгааны ажлыг бичихдээ мэдээлэл, шуудан харилцаа холбоо технологийн Цагаан ном, Нэгдсэн үндэстний байгууллагын баримт бичгийг түлхүү ашигласан болно. Судалгааны ажлыг бичихдээ баримтанд тулгуурласан шинжилгээний арга, харьцуулалтын арга, задлан шинжлэх, нэгтгэн дүгнэх аргуудыг хэрэглэсэн болно.

Нэгдсэн үндэстний байгууллагаас цахим засаглалын индексийг тодорхойлохдоо доорх хүчин зүйлсүүдийг шалгуур үзүүлэлт болгон авч үздэг. /Cхем 1/

Манай орны хувьд 2003 онд “Цахим монгол хөтөлбөр”-ийг Нэгдсэн үндэстний байгууллагын уриалгын үндсэн дээр төрөөс тусгайлан баталж цахим засаглалыг уг хөтөлбөрийн нэг бүрэлдэхүүн болгож хэрэгжүүлж эхэлснээс хойш  хөтөлбөрийн хүрээнд хэрэгжиж байгаа салбаруудын хөгжлийн явцыг доорх судалгааны үр дүнгээс харж болно.