Өнөөдөр Монголын орчин үеийн амьд хөгжмийн холбооны албан ёсны нээлтийн хэвлэлийн хурал боллоо.

Хуралд “Улаанбаатар” чуулгын дарга Р.Мөнхсайхан, “Инди” хөгжмийн холбооны тэргүүн Л.Энх-Амгалан болон “UB night” хамтлагийн ахлагч Г.Даваасүрэн нар оролцсон юм.

Тус холбоог "Нисванис" хамтлагийн ахлагч Л.Энх-Амгалан санаачлан байгуулсан бөгөөд залуу уран бүтээлчдийг дэмжих, энэ төрлийн урлагийг хөгжүүлэх зорилготой аж.

Холбооны анхны ажил бол “UB NIGHT” амьд хөгжмийн хамтлагийн “A Hard day`s night” нэртэй анхны бие даасан тоглолтыг зохион байгуулах юм. Тоглолт энэ сарын 9-нд 19.00 цагаас Залуучуудын соёлын төвийн тайзнаа ганцхан удаа болно.

Уг тоглолтын үеэр нийт 26 дууг дуулах бөгөөд дэлхийд алдартай хамтлаг, дуучдын бүтээлүүдээс гадна монгол дуучдын дуунуудаас хөгжим сонирхогч залууст хүргэх ажээ.