Драмын урлагийн шилдгүүдийг тодруулдаг “Гэгээн муза 11” олон улсын наадмын хоёрдугаар шатны шалгаруулалтын тоглолт өчигдөр эхэллээ.Увс аймгийн Э.Цэрэвийн нэрэмжит “Ойрад” хөгжимт жүжгийн театрын уран бүтээлчид “Ээрэн Хүрээ” үндэсний дуулалт жүжгийг УДЭТ-ын тайзнаа толилуулна. Зургаан үзэгдэлт уг дуулалт бүжгэн жүжгийн хөгжмийн зохиолчоор Ш.Өлзийбаяр, тайзны зураачаар О.Баярмагнай, бүжиг дэглээч М.Мөнгөнцэцэг зэрэг залуу уран бүтээлчид ажиллаж байна. Харин гол дүрийг С.Гал, Б.Мөнхтогтох нар бүтээжээ.
Дөрвөн Ойрадын ард түмний эв нэгдэл найрамдлыг магтан дуулсан, үндэсний дуулалт бүжгэн жүжиг таныг хэсэг хугацаанд өвөг дээдэс, аав ээжтэйгээ эргэн уулзсан мэт орчинд урин залж, ахуй нутгаараа зочлон хүндлүүлсэн мэт сэтгэгдэл төрүүлнэ.
Наадмын хоёрдугаар шатны шалгаруулалтын тоглолтууд энэ сарын 18-ныг хүртэл үргэлжилнэ. Мөн өнөөдөр “Гацуурхан” театрын бүтээл “Чоно ба долоон ишиг” жүжиг Нийслэлийн Улаанбаатар чуулгын тайзнаа амилах юм.
Дашрамд сонирхуулахад, Увс аймагт 1925 оны 11 дүгээр сард “Ший” нэртэй анхны урлагийн газрыг байгуулж, энэ ажлыг ардын Засгийн газрын анхны долоогийн нэг Догсом хурц түүний төлөөний түшмэл Лувсанцэрэн, Житхайн Бат, Эвлэлийн товчлох хорооны дарга Жамсран, Намын үүрийн дарга Дадан, партизан Ётуун хэмээх Равдан нар туслан дэмжиж тэр үеийн Улаангомын хүрээний нэг байшинд “Бээжин лам” гэдэг шийгээр анхны тоглолтоо толилуулж байжээ. Тус театрыг аймгийн ИТХ-ын тэргүүлэгчдийн 2010 оны 09-р сарын 15-ны өдрийн 116-р тогтоолоор МУГЖ Э.Цэрэвийн нэрэмжит болгосон юм.
