Газрын тосны газрын дарга асан Д.Амарсайхан хорих 461-р ангийн уулзалтын өрөөнд амьсгал хураасан талаарх харамсалтай мэдээлэл бидэнд ирлээ.

 Тэрбээр Засгийн газраас “Петро чайна дачин тамсаг” компанитай байгуулсан бүтээгдэхүүн хуваах гэрээний орлогоос нэг хувийг нь хувийн данс руугаа шилжүүлж байсан гэх хэрэгт сэжиглэгдсэн юм. Өөрөөр хэлбэл,  Эрх мэдэл, албан тушаалаа ашиглан Монгол Улсын Засгийн газарт орох ёстой хөрөнгөөс завшиж гэж хуулийн байгууллагынхан үзсэн юм. Улмаар түүнийг УМБГ-аас харьяаллын дагуу АТГ-ын Мөрдөн шалгах хэлтэст шилжүүлэн шалгаж байсан бөгөөд энэ хугацаанд түүнийг мөрдөн байцаалтаас оргон зайлсан гэх цуу яриа ч гараад байсан билээ. Тэгвэл тэрбээр цагдан хоригдох 461 дүгээр ангид хоригдож байгаад  ийн амьсал хураажээ. Түүний амьсгал хураасан шалтгааныг хүмүүс янз бүрээр тайлбарлаж байна. Зарим хүн гадны нөлөө 100 хувь орсон гэж байгаа бол нөгөө хэсэг нь шоронгийн хүнд нөхцлийг даасангүй гэцгээж байгаа юм. Юутай ч хэдхэн цагийн өмнө болсон эл хэрэг олны анхаарлыг ихэд татаж байна. Учир нь авлига, мөнгө идсэн хэргээр хоригдож байгаад ийн амиа алдаж байсан тохиолдол төдийлөн байдаггүй билээ.

Д.Амарсайхан нь МАН-ын бага хурлын нөлөө бүхий гишүүн байсан юм.

Юутай ч Шүүхийн шийдвэр гүйцэтгэх газраас энэ талаарх тодорхой мэдээллийг албан ёсоор өгөхгүй байна.

Харин эх сурвалжуудын мэдээлж буйгаар тэрбээр ужиг, хууч өвчтэй байсан ба өмгөөлөгч болоод ар гэрийнхэнтэйгээ уулзаж байгаад амьсгал хураасан гэв.