Өнгөрсөн онд “Ану хатан” түүхэн уран сайхны киногоо олны хүртээл болгосон “Шүүдэр” продакшны дэлгэцийн хоёр дахь бүтээл "Улаан пальто" ирэх энэ сарын 21-нд нээлтээ хийх гэж байна.

Зохиолч Б.Шүүдэрцэцэгийн “Улаан пальто” өгүүллэгээс сэдэвлэн бүтээсэн уянгын драм төрлийн энэ кинонд МУСТА О.Долгор, жүжигчин Т.Өөдөө, О.Байгаль болон 23-р сургуулийн сурагч Ч.Энхномуун нар тогложээ.

Эх үрийн нандин холбоо, хүний сүнс төрөл сэлгэн мөнх оршдог тухай сонирхолтой сэдвийг хөндсөн энэхүү киноы хөгжмийг гитарчин Өөжгий бичиж, зураглаачаар МУСТА С.Баттулга ажилласан юм.

Зохиолчийн долоон жилийн өмнө бичсэн өгүүллэгийг уншсан басхүү “Шүүдэр” продакшнийн дараагийн бүтээлийг хүлээж буй үзэгчдийн дунд багагүй хүлээлт үүсгээд буй энэхүү кино нь далд ертөнцийн сэдвийг хөндсөнөөрөө сонирхолтой бөгөөд  уран бүтээлчид нь мөнгө хөөгөөгүй, харин өнөөгийн хүнд хэцүү амьдралд өнгө нэмсэн, өөдрөг гэгээн, хайр энэрэл ундраасан  кино хийх зорилт тавьжээ.

Дүр сонголтын хувьд ч О.Долгор, Т.Өөдөө, сүүлийн 16 жил кинонд тоглоогүй О.Байгаль нарын чадварлаг жүжигчдийг  нэгэн кинонд нэгтгэснээрээ үзэгчдийн сонирхлыг эрхгүй татаж байгаа.

Киноны эрэгтэй дүрүүдэд МУГЖ Г.Равдангийн хүү жүжигчин Р.Баттогтох, О.Байгальтай хамт СУИС-ийн жүжигчний анги төгссөн Д.Бат-Оргил, “Ану хатан”-д О.Долгорын партнер болж байсан жүжигчин Б.Батжаргал нар тоглосон байна.