Хорих ангид саатуулагдаж байсан иргэн амиа алдсанаар иргэдийн хуулийн байгууллагад итгэх итгэл бүр л алдагдаж байна. Учир нь энэ асуудлаас болоод иргэд хүн хэрэг хийсэн байж болох ч хүний амь үнэтэй гэдгийг хуулийн байгууллагынхан мэдэх хэрэгтэй гэдгийг онцолсоор байгаа юм.

Тэр дундаа АТГ-ын үйл ажиллагааг сүүлийн үед шүүмжлэх иргэд олширлоо. Учир нь АТГ-ынханы арга дандаа мөнгөтэй, чинээлэг хүмүүс рүү чиглэж байгааг иргэд хэлж байна. Тэд том бизнесменүүдийн авлигын хэргийг илрүүлж байгаа нь зөв ч бодлогоо өөрчлөх нь зүйтэй болов уу гэх хүмүүс ч байгаа.

Хэрэгт сэжиглэгдсэн хүн бүрийг баривчлан саатуулаад, хорьж цагдсаар амиа алдахад хүргээд байвал АТГ хийгээд шүүхийнхнийг эсэргүүцэх хүмүүсийн хүрээ улам тэлэгдэх шинжтэй.

Өөрөөр хэлбэл, хорих ангид саатуулагдсан иргэд төрийн хамгаалалтанд байгаа гэсэн үг. Гэтэл төр хүнээ хамгаалж чадахгүй, төрийн байгууллагын бусармаг үйлдлээс болж хүний алтан амь эрсэдсэн гашуун түүх энэ боллоо.

Ер нь авлигын хэргээр саатуулагдсан томчуудаас сүүлийн 20 жил ийн хорих ангид ял эдэлж байгаад амиа алдах тохиолдол гарч байгаагүй гэнэ. Харин ялаа эдлээд, хоригдож байгаа хүмүүсээс 17 иргэн өнгөрсөн онд нас барж, энэ оны эхний таван сарын байдлаар 5 хүн хорвоогийн мөнх бусыг үзүүлээд байна. Хуулийнхны хэлж буйгаар эдгээр амиа алдаж байгаа иргэдийн ихэнх нь зүрхний шигдээс, тархины цус харвалтаар өөд болдог байна. Гэвч энэ бүхнээс сэргийлж тухайн хорих ангийн эмч, мэргэжилтнүүд шаардлагатай үзлэг оношлогоог цаг ямагт тавьж байх хэрэгтэй билээ.

Юутай ч АТГ-ын “эрх мэдэлт” албан тушаалтнууд хүнийг үхтэл нь хорино гэдэг байж боломгүй зүйл.  Тэд хүний амь гэдэг юу ч биш, өвчнөө хэлээд сууж байгаа нь зүгээр л “баанш” гэж үздэг нь энэ үйл явдлаас тод томруун харагдлаа.

Өчигдөр АТГ-ын албан тушаалтнуудаас талийгаач Газрын тосны газрын дарга асан Д.Амарсайханы талаар асууж тодруулахаар сэтгүүлчид очсон. Гэвч тус газрын “мундаг” албатууд цаг гаруй сэтгүүлчдийг хүлээлгэснийхээ эцэст “тайлбар өгөх боломжгүй” хэмээн буцаасан юм.

Том бизнесменүүдийг овоо хараандаа авсан гэх АТГ-ын мөрдөн байцаалт явуулж байгаа арга барил, ёс зүйгүй байдлыг төр засгаас ч гэсэн анхааралдаа авах цаг хэдийнэ болсон мэт.

Эсвэл энэ байгууллагад улс төрийн нөлөө аль хэдийнэ орсон болохоор чимээгүйхэн ингээд өнгөрөх үү гэдэг бас л сонин.

Гэвч ард иргэдийн хуулийн байгууллагынхны эсрэг гаргаж байгаа гомдол, саналыг нарийвчлан харж үзэж хэрэгжүүлэх хэрэгтэй зүйлсийг нь хэрэгжүүлж, АТГ-ын үйл ажиллагаанд хяналт тавих хэрэгтэй юм шиг.

Энэхүү нийтлэлээрээ баривчилгааг болиул гэж байгаа юм биш, зөвхөн хүний амь ямар чухал вэ гэдгийг хаа хаанаа ойлгож, ухамсарлаж ажиллах хэрэгтэй байна гэдгийг л илтгэхийг зорьлоо.

Юутай ч эл шүүмжлэлээ ОХУ-ын ерөнхийлөгч Владимир Путины хэлсэнээр “Баривчилгаагаар авлигыг шийддэггүй. Гэхдээ баривчилгааг зогсоож болохгүй” гэдэг үгээр энд хүргээд дуусгая.

Д.Дуулим