Манай улсаас гарах сануулга аваад байсан БНХАУ-ын Вэнь Шин буюу Н.Алхаа Нийслэлийн цагдаагийн газрын байцаагч Ж.Батбаярыг өөрөөс нь таван сая төгрөг авсан ч буцааж өгөөгүй гэх мэдээлэл өгсөн. Харин Вэнь Шиний өгсөн мэдээллийг цагдаагийн байгууллагаас үгүйсгэлээ.
Тодруулбал,  Вэнь Шин буюу Н.Алхаа таван жилийн өмнө манай улсын хуулийн байгууллагад хулгайн хэргээр шалгагдаж байжээ. Түүний танил Авирмэд, Ганболд нар Вэнь Шинийг дээрмийн гэмт хэргийн захиалагч гэж гүтгэснээр хэрэгт шалгагдсан гэж Вэнь Шин мэдээлж байсан юм. Харин хэрэгт шалгагдаж байх үед Нийслэлийн цагдаагийн газрын байцаагч Батбаяр батлан даалтад гаргахаар таван сая төгрөг авсан ч буцааж өгөөгүй таван жил өнгөрсөн талаар Вэнь Шин ярьсан юм.

Тэгвэл Вэнь Шин болон Г.Ням-очир нарын яриад байгаа цагдаа таван сая төгрөг аваад буцааж өгөөгүй гэх асуудалд ЦЕГ-аас дараах тайлбарыг өгч байна.

ЦЕГ-ын Хэвлэл мэдээллийн төвийн дарга, хурандаа Б.Баатархүү хэлэхдээ “Иргэний харъяалал шилжилт хөдөлгөөний ерөнхий газраас БНХАУ-ын иргэн Вэнь Шинд манай улсаас гарах сануулга өгсөн. Харин Вэнь Шин Нийслэлийн цагдаагийн газрын байцаагч Батбаярыг таван сая төгрөг авсан гэх мэдээллийг өгснөөр Иргэний харъяалал шилжилт хөдөлгөөний ерөнхий газраас цагдаагийн ажилтан Вэнь Шинээс таван сая төгрөг авсан эсэхийг тодруулахаар Вэнь Шиний гарах хугацааг хойшлуулаад байгаа юм. Гэвч таван сая төгрөгийг буцааж өгснийг цагдаагийн байгууллагаас нотоллоо. Мөн Вэнь Шин хэрэгсэхгүй болсон хэргийн төлөө албадан гаргаж байна гэх мэдээллийг өгч байсан ч Иргэний харъяалал шилжилт хөдөлгөөний ерөнхий газраас түүнийг гэр бүлийн шалтгаанаар албадан гаргахаар болсон гэж мэдэгдсэн. Учир нь Вэнь Шин 1994 онд манай улсын иргэн Н.Ундармаатай гэр бүлж болж, охинтой болсон. Харин эхнэр охин хоёр нь 1999 онд Франц улс руу цагаачлахаар явж, эхнэр нь 2010 онд хорт хавдрын улмаас тус улсад нас баржээ. Вэнь Шин манай улсад хувийн хэргээр оршин суух хугацаагаа сунгуулахаар удаа дараа хандахдаа зөвхөн гэр бүлийн шалтгаанд үндэслэж байжээ. Гэтэл 1999 оноос хойш гэр бүлээсээ тусдаа амьдарсан байна. Тиймээс Вэнь Шинийг албадан гаргахаар болоод байсан юм” гэв.