"Эмнести Интернэшнл"  хүний эрхийг хамгаалагчдын даян дэлхийн хөдөлгөөний гүйцэтгэх захирал Б.Алтантуяагаас гэмт хэргийн тухай хуулийн талаар зарим зүйлийг тодрууллаа.

-Танайхаас гэмт хэргийн тухай хуульд өөрсдийн санал санаачлагаа дэвшүүлсэн үү. Ямар нь энэ талаар ямар байр суурьтай байна?
-Монгол Улсын шинэ засгийн газарт Эрүүгийн байцаан шийтгэх хуулиндаа оруулах өөрчлөлтийн талаарх санал зөвлөмжийг хүргүүлсэн. Энэ санал, зөвлөмж одоогийн гэмт хэргийн тухай хууль бусад хуулиудад бүрэн тусгалаа олчихсон байгаа. Тиймээс бид гэмт хэргийн тухай хуулинд байгаа эрүүдийн байцаан шийтгэхтэй холбоотой болоод хүн төрөлхтөний эсрэг гэмт хэрэг зэргийн талаар саналаа өгсөн. Тэгэхээр энэ олон зүйл заалтууд маань энэ хэвээрээ батлагдаасай хэмээн хүлээж байна.

-Гэмт хэргийн хууль дээр яг ямар зүйлүүдийг шүүмжилж байгаа вэ?
-Эрүүдэн шүүх, цаазаар авахтай холбоотой олон улсын эрх зүйн хүрээнд гэмт хэрэг гэж тооцогдох зүйлүүд дээр манай заалт орсон.

-Цаазаар авах ялыг танайхаас цөөнгүй жилийн хүрээнд халая гэж санаачилсан байх аа?
-Манай байгууллага байгуулагдсан цагаасаа хойш л цаазаар авах ялыг халахыг дэмжиж ажилласаар ирсэн. Тиймээс эрүүгийн хуулиар цаазаар авах ялыг халах ёстой гэж үзэж байгаа.

-Ер нь цаазын ял байхгүй болсоноос хойш гэмт хэргүүд нэлээд хүнд төрөлрүүгээ ороод байна гэх иргэд байна шүү дээ?
-Үүнийг хүмүүс мэдээлэл дутмагаасаа болоод ганцхан өнцөгөөс  харж байна гэж үзэж байна. Альч улс оронд цаазаар авах ялыг халсанаас болоод гэмт хэрэг нэмэгдэх, ихсэх шалтгаан байгаагүй. Цаазаар авах ялыг халсанаас хойш Монгол Улсад байдал хүндэрлээ гэвэл энэ нь өөр шалтгаантай гэж хэлмээр байна. Өөрөөр хэлбэл, нийгэм, шударга ёсонд итгэх итгэл алдарсанаас, нийгэм өнөөдөр боловсролдоо анхаарахгүй байгаагаас, нийгэм өнөөдөр ёс суртахуун хүмүүжил гэр бүл дэх хүчирхийллийн орчинг гаргуулахгүй таслан зогсоохгүй байгаагаас тэнд өссөн хүмүүс хүчирхийлэгч болж байна. Хүчирхийлэл өөрөө хүчирхийллийг бий болгож байна. Нийгэмд өнөөдөр ядуурал, тэгш бус байдал газар авч байна. Энэ маань өөрөө гэмт хэргийн гаралтыг ихэсгэж байна. Нийгэм өөрөө хариуцлага тооцож чаддаггүй. Харин бусдад ял завшуулдаг. Тиймээс энэ гэмт хэрэг гараад байна. Гэмт хэрэг бол нийгмийн үзэгдэл. Нийгэм байгаа тохиолдолд гэмт хэрэг байсаар байна. Гэхдээ нийгмийн шударга бус байдалд аймшигт хүчирхийлэл бүр илүү гарсаар байдаг.