Зэвсэгт хүчний анги нэгтгэлүүдийн дунд жил бүр зохиогддог марш тактикийн тэмцээний бэлтгэлд гарсан цэргийн албан хаагч амиа алдсан хэрэг гарсан. Тодруулбал, Тавантолгой дахь сургалтын нэгдсэн төвд очиж бэлтгэл хийж байсан 120 дугаар ангийн албан хаагч Д нь энэ сарын 13-ны өдрийн 22.00 цагийн үед нас барсан ч ар гэрийнхэнд нь уржигдар өглөө хэл дуулгасан талаар эх сурвалжууд мэдээлсэн. Ар гэрийнхэн нь талийгаачийг биедээ багагүй гэмтэл авсан байдалтай, байрлаж байсан байрнаасаа 300 метрийн зайд амиа алдсан байсан гэж байгаа. Гэвч Тавантолгойн сургалтын төвийнхөн болон Зэвсэгт хүчний жанжин штабын удирдлагуудүүнийг  үгүйсгэж байна. Талийгаач 21 настай, ахлагчийн сургууль төгссөнөөсөө хойш 120 дугаар ангид ажиллажээ. Ар гэрийнхэн нь талийгаачийн цогцост нарийн шинжилгээ хийлгэхээр шүүх эмнэлэгт хандаад байгаа. Гэвч өчигдрийн болтол талийгаач залуугийн ар гэрийнхэн Шүүх шинжилгээний эмнэлэгт ирээгүй талаар эх сурвалж хэллээ. Учир нь тэднийх хөдөө орон нутгийн айл гэнэ.
Б.Баатархүү: Талийгаач эмнэлэг ирэхэд амиа алдсан байсан
Хэргийн  талаар ЦЕГ-ын хэвлэл мэдээллийн дарга, цагдаагийн хурандаа Б.Баатархүүгээс тодрууллаа.

-Маршийн тэмцээнд цэрэг амиа алдсан талаарх мэдээлэл үнэн үү?
-Тавантолгойд Маршийн бэлтгэлд гарсан цэргийн албан хаагчид бэлтгэл сургуулилт хийж байгаад сургуулилтын дараа нэг цэрэг нь ухаангүй олдсон. Төв аймаг дахь цагдаагийн алба хаагчид хэргийн газар үзлэг шалгалт хийсэн. Тухайн байгууллагаас нь яаралтай эмнэлэгт хандсан байсан ч харамсалтай нь амь насаа алдсан байсан. Анхан шатны хэргийн газрын үзлэгээр хохирогчийн биед ил харагдах гэмтэл шарх байгаагүй гэдгийг хэрэг дээр ажилласан ажилчид хэлж байгаа. Одоо бол задлан шинжилгээгээр үхлийн шалтгаан юу байсан нь тодорхой болно.

-Хаанаас олдсон бэ?
-Байрлаж байсан байхнаас 200 орчимын зайд оройноос гүйлтээс бэлтгэл сургуулилт хийж, ирж яваад нас барсан байх гэсэн байдалтай байгаа. Одоо бол хэрэг дээр мөрдөн байцаалт хийж байгаа.

Амиа алдсан цэргийг тархины усжилттай, суурь өвчтэй байсан гэв
Зарим эх сурвалжуудын мэдээлж буйгаар уг цэрэг нь суурь өвчтэй байсан байх магадлалтай гэнэ. Тодруулбал, тархиндаа өвчтэй, устай байсан байж магадгүй талаар эх сурвалж хэллээ.

Хэрэв энэ үнэн бол  суурь өвчтэй хүнийг сайн шалгаж, эмчийн хяналтанд оруулаагүй Марш тактикийн тэмцээнд оруулсан тухайн ангийн захирагч нар буруутай болж таарах юм.
ЗХЖШ: Шүүх эмнэлгийн урьдчилсан дүгнэлтээр гадны нөлөөгүй гэж гарсан
Юутай ч  хэргийн талаар албаны хүнээс тодруулахаар Зэвсэгт хүчний жанжин штабын зориход тэднийхээс байр энэ талаар дорвитой хэдэн өгүүлбэр хэлчих албан тушаалтан байсангүй. Харин хэвлэлийн төлөөлөгч эмэгтэйтэй нь утсаар холбогдсоны эцэст “Ийм хэрэг гарсан нь үнэн. Шүүх эмнэлгийн урьдчилсан дүгнэлтээр гадны нөлөөгүй гэж гарсан. Удахгүй шүүх эмнэлгийн хариулт гарахаар мэдээлэл хийнэ” гэв.

Мөн Шүүх эмнэлгийн холбогдох албаны хүнээс шинжилгээний хариу хэзээ гарахыг тодруулахад “Шинжилгээнд оруулаад эхэлчихсэн байгаа. 14 хоногийн дараа хариу гарах байх” гэв.

Түүнчлэн, талийгаачийн ар гэрийнхэн Төв аймагт байдаг бөгөөд өнөөдөр Шүүх эмнэлэгт ирж байгаа аж.