Шинэчлэлийн Засгийн газар дотроо ихээхэн асуудалтай байна. Зарим сайд нар нь өөрсдийн хүсэлтээр ажлаа өгсөн. Заримтай нь хариуцлага тооц гэж ҮАБЗ шийдвэр гаргасан.
Шинэчлэлийн Засгийн газар дотроо ихээхэн асуудалтай байна. Зарим сайд нар нь өөрсдийн хүсэлтээр ажлаа өгсөн. Заримтай нь хариуцлага тооц гэж ҮАБЗ шийдвэр гаргасан. Бас заримыг нь огцруулалгүй авч үлдэв. Энэ мэтээр сайд нарын хоорондын асуудал гүнзгийрч байхтай зэрэгцэн агентлагуудын дарга нар нь "том толгой" гаргах болжээ. Тухайлбал ШӨХТГ-ын дарга О.Магнай Ерөнхий сайдынхаа үгэнд орохоо байжээ. Тэгээд дураараа шийдвэр гаргаж, дуртай үедээ гадаадад зугаалж Шинэчлэлийн Засгийн газрын тэргүүнийг бухимдуулж эхлэв. Түүний үйлдэл удаа дараа давтагдах болсон тул 2014 оны 05.08 өдөр Ерөнхий сайд захирамж гаргаж О.Магнайтай хариуцлага тооцжээ. Уг хариуцлага нь О.Магнайгийн цалинг 3 сар 20 хувиар бууруулахыг байж.
Учир нь Төрийн албаны тухай хуулиар "Төрийн жинхэнэ албан хаагчид түүнийг томилсон төрийн байгууллагын эрх бүхий албан тушаалтны шийдвэрээр сахилгын шийтгэл ногдуулна" гэсэн заалт байдаг аж. Уг заалтын дагуу О.Магнайг томилсон Ерөнхий сайд сахилгын шийтгэл ногдуулжээ. Хэрэв О.Магнай алдаагаа дахин давтвал Ерөнхий сайд ажлаас нь чөлөөлнө гэдэгээ урьдчилан сануулсан гэнэ.
Ерөнхий сайдыг бухимдуулах болсон шалтгаан нь О.Магнай Засгийн тэргүүндээ хэлэлгүй удаа дараа гадаадаар зугаалжээ. Тийм ч учраас түүнд сахилгын шийтгэл ногдуулахдаа Засгийн газрын агентлагийн эрх зүйн байдлын тухай хуулийн 15.2-ийг үндэслэн шийтгэжээ. Энэхүү заалт нь "Агентлагийн даргыг гадаад улсын ижил төрлийн байгууллага, олон улсын болон бусад байгууллагад туршлага судлах, мэргэжлийн сургалтад явах, хурал, зөвлөлгөөнд оролцох /цаашид албан томилолт” гэх/-ыг Монгол Улсын сайд шийдвэрлэнэ" гэсэн заалт болж таарав. Өөрөөр хэлбэл Н.Алтанхуягийг сайд гэж тоолгүй, хаашаа явахаа хэлэлгүй дураараа дургидаг нь ил болов.
Харин энэхүү шийтгэлийг хүлээн авсан ШӨХТГ-ын дарга ямархуу хариу үйлдэл үзүүлсэн нь одоохондоо тодорхойгүй байна. Ямар ч гэсэн Ерөнхий сайд, О.Магнай хоёрын харилцаа хүйтэрч хооронд нь "хар муур гүйх" болсон гэсэн яриа түгж байна. О.Магнайг торгуулах ажлыг Засгийн газрын нэгэн сайд шордсоор байж ажил хэрэг болгосон гэж эх сурвалж мэдээллээ.
Сэтгэгдэл (35)