Цагдан хорих 461-р ангийн ерөнхий эмчийн хэлсэн энэ үг нийгэмд ихээхэн дуулиан дэгдээж байна. Төрийн өндөр албан тушаал хашиж байсан хүнийг цагдан хорих газар ямар ч эмнэлэгийн тусламж үзүүлэлгүй хорьж байгаад амь насыг нь хохироосон явдал гадныхны анхаарлыг ч татаж эхэлжээ. Дарга ч бай, жирийн иргэн ч бай Үндсэн хуулиараа эмчилгээ авах ёстой. Амьд явах эрхтэй. Гэтэл дарга хийж байсан гэдгээр нь өширхөж дээрээс "эмчилгээ хийж болохгүй шүү" гэж үүрэг өгсөөр хүний аминд хүрсэн эрх баригчдын үйлдэл нийгэмд олон зүйлийг бодогдуулж байна. Авлига, албан тушаалын хэргээр шалгаж болно. Хамгийн гол нь "эмчилгээ хийж болохгүй шүү" гэж яргалаж байгаад хүний аминд хүрсэн нь аймаар. Төрийн эрхийг барьж байгаа дарга нар өмнөх хүмүүстэй ингэж өширхөж, хүндэтгэлгүй хандана гэдэг санаанд багтамгүй. Гэхдээ ард түмний өмнө болоод өнгөрлөө.

    Энэ байдлаас хэн гэдэг дарга дээрээс "Д.Амарсайханд эмчилгээ хийж болохгүй шүү" гэсэн үүрэг өгсөн бэ? гэдэг асуудал анхаарал татна. Цагдан хорих 461-р ангийн ерөнхий эмч ингэж хэлснийхээ эзэн болж "хүнийг эмчилж болохгүй гэдэг дээд хүн"-ийхээ нэрийг хэлэх хэрэгтэй боллоо. Ард түмэн үүнийг шаардаж эхлэв. Эх сурвалжийн мэдээлж байгаагаар бол цагдан хорихын эмч нарын ингэж хэлсэн үгийг Д.Амарсайханы ар гэрийнхэн бичээд авчихсан бололтой. Тэд удахгүй энэхүү бичлэгээ олон нийтэд ил болгоно гэсэн сураг гарч байна. Хэрэв ийм бичлэг байгаад тэр нь нийгэмд ил гарвал нэг байтугай нилээд олон хүн дээлээ нөмөрч мэдэхээр болов.

    Цагдан хорих 461-р анги, Шүүхийн шийдвэр гүйцэтгэх ерөнхий газар Хууль зүйн яамны мэдэлд байдаг гэнэ. Тиймээс "дээд хүн" гэдгийг эхний ээлжинд Хууль зүйн яамнаас хайх хэрэгтэй болж байх шиг байна. Хамгийн сүүлийн мэдээллээр бол Хууль зүйн яам, цагдаа, АТГ-ынхан хэргийг бие биерүүгээ чихэж эхэлсэн сураг гарлаа.

    Үүнтэй зэрэгцээд МАН-ынхан зүгээр суусангүй. Учир нь талийгаач МАН-ын Бага хурлын гишүүн байж. Бас энэ намын нэрээр агентлагийн даргаар томилогдож байсан юм. Тиймээс МАН-ынхан анхаарал хандуулах нь гарцаагүй. Ингээд өнгөрсөн 5 өдөр МАН-ын дарга тэргүүтэй хүмүүс Ерөнхий сайдаас нэгэн гишүүнийхээ амийг нэхэж, хариуцлагагүй хүмүүстэй хариуцлага тооцохыг шаардсан юм. Харин Засгийн тэргүүн энэ бичигийг авсны дараа ихээхэн эмзэглэж салбарын хүмүүсээ дуудаж асуудлыг тодруулахыг үүрэг болгосон сураг гарлаа. Бас хууль зүйн яаманд энэ асуудлыг тодруулахаар ажлын хэсэг гарсныг эх сурвалж мэдээллээ.

    Д.Амарсайхныг авлигалын хэргээр нилээд удаан шалгаж байж. Хориод, суллаад буцааж хийгээд байсан гэнэ. Хамгийн сүүлд хориод 28 хоносон гэж мэдээлж байгаа. Талийгаачийн хамгийн сүүлд хорихын байранд ухаан алдаж унахдаа "Би үхлээ" гээд орилсон гэдэг. Түүний сүүлчийн үг эрх баригчдаас амиа нэхснийг сануулна. Д.Амарсайхныг сүүлд хоригдсоноос нь хойш нийт 8 удаа эрүүл мэндийн үзлэг хийж. Тэр болгонд нь шинжилгээний хариу муу гарчээ. Харин эрх мэдэлтнүүд түүний шинжилгээний хариу муу гарсныг мэдсээр байж эмнэлэгт хэвтүүлж болохгүй гэж үүрэг өгөн бахь таваа хангаж байсныг бодохоор манай нийгэм энэрэнгүй ардчилсан биш харгис дарангуйлагч болон хувирч байгааг ойлгож болох юм.

    Нөхцөл байдал ингэж хүндэрч байгаа учир Д.Амарсайханыг нас барсантай холбогдуулан эрүүгийн хэрэг үүсгэн асуудлыг шалгаж эхэлсэн. Энэ хүрээнд нилээд олон хүнийг шалгаж байцааж. Ард түмэн хамгийн түрүүнд Шүүхийн шийдвэр гүйцэтгэх ерөнхий газрын харьяа 461 дүгээр хорих ангийн Ерөнхий эмч, ахлах дэслэгч Б.Дарханбатыг шалгах ёстой гэж ярилцах болов. Учир нь тэр маш олон зүйлийг мэдэж байсан "хэн түүнийг эмчилж болохгүй гэж үүрэг өгснийг гэрчилнэ" хэмээх яриа дэлгэрч байна. Утасны үзүүр эндээс хөврөх болчихлоо.