Манай сайт та бүхэнд томчуудын хийгээд улс оронд багагүй хохирол учруулсан гэмт хэргийн мөрдөн байцаалтын явц, шийдвэрлэлтийг нэхэн сурвалжилж “гэмт хэргийн тойм”-оороо хүргэдэг.

Тэгвэл энэ удаагийн тоймоороо энэ сард гарсан төрийн албаныхан хийгээд олны танил хүмүүс, төрийн байгууллагуудын хэрэгт татагдсан байдал мөн өмнөх хэргүүдийн мөрдөн байцаалтын явцын талаар түүвэрлэн хүргэхээр бэлтгэлээ.

МИАТ-ын Ч.Хоролсүрэнд дахин эрүүгийн хэрэг үүсгэснийг прокуророос мэдээлэв
Ч.Хоролсүрэн нар нь бусадтай бүлэглэн 2008 оны 08 дугаар сарын 06-ны өдөр электрон тийзийн дэмжлэг төлбөр гэх нэрээр МИАТ ТӨХК-иас 297,000 ам.долларыг БНХАУ-ын засаг захиргааны тусгай бүс Хонг Конгийн нэр бүхий компанийн данс руу удаа дараагийн үйлдлээр шилжүүлж дээрх мөнгийг Монгол Улсын Голомт банкинд дахь иргэн Н.Гантөмөр,О.Тамирын нарын дансуудаар буцаан шилжүүлэн авч ашигласан үйлдэлд Цагдаагийн Ерөнхий газрын Зохион байгуулалттай гэмт хэрэгтэй тэмцэх газрын Эдийн засгийн гэмт хэрэг мөрдөх хэлтсээс2013 оны 12 дугаар сарын 16-ны өдөр Эрүүгийн хуулийн тусгай ангийн 150 дугаар зүйлийн 150.3 дахь хэсэгт зааснаар эрүүгийн хэрэг үүсгэн шалгаж байна.

"Flash" хамтлагийн гишүүн хар тамхины хэрэгт байцаалт өгч байна
"Flash" хамтлагийн нэгэн гишүүн хар тамхины хэрэгт холбогдсон талаар бид мэдээлсэн. Тэрбээр цагдаагийн байгууллагад найзуудынхаа хамтаар байцаалт өгч эхэлсэн хэмээн эх сурвалжууд мэдээллээд байгаа. Тэгвэл энэ талаар албаны хүнээс тодруулахад "Тус хамтлагийн нэг гишүүнээс мэдүүлэг авч байгаа нь үнэн. Гэхдээ хорьж цагдсан зүйл байхгүй. Учир нь уг хамтлагийн гишүүнтэй хамт явж байсан хүмүүс хар тамхины хэрэгтэй холбогдолтой байж болзошгүй байгаа. Харин "Flash" хамтлагийн гишүүний хувьд хамт явж байсан гэдэг утгаар хар тамхитай хамааралтай эсэхийг шалгаж байна" гэв.

Гар утас татваргүй оруулуулахыг завдсан гаалийн байцаагчид шалгагдаж байна
АТГ-ын ажилтнууд  “Чингис хаан” олон улсын нисэх онгоцны буудлаас Гаалийн байгууллагын хоёр ажилтныг баривчилсан байгаа. Тодруулбал, Гаалийн улсын ахлах байцаагч Д.Батжаргал, н.Нямдорж нарыг баривчилсан юм.   Учир нь тэд бусдын авчирсан хоёр чемодан гар утсыг хилээр татваргүй оруулж ирэхэд нь тусалж, гаалийн хяналт шалгалтаас бултуулсан агаад улсын төсөвт орлого төвлөрүүлэх үүрэгтэй гаалийн байцаагч нарын хууль бус үйлдэл нь хяналтын камерын бичлэгт үлдсэн байна.

Марш тактикийн тэмцээнд бэлтгэж байсан цэрэг амиа алдав
Зэвсэгт хүчний анги нэгтгэлүүдийн дунд жил бүр зохиогддог марш тактикийн тэмцээний бэлтгэлд гарсан цэргийн албан хаагч амиа алдсан хэрэг гарсан. Тодруулбал, Тавантолгой дахь сургалтын нэгдсэн төвд очиж бэлтгэл хийж байсан 120 дугаар ангийн албан хаагч Д нь энэ сарын 13-ны өдрийн 22.00 цагийн үед нас барсан байдаг. Улмаар түүнийг гадны нөлөөгүй нас барсан талаар шүх эмнэлгийн урьдчилсан дүгнэлтээр тогтоогоод байгаа. Гэсэн ч хүн нас барсан, хүний амьтай холбоотой хэрэг учир уг хэрэгт цагдаагийн байгууллагаас эрүүгийн хэрэг үүсгэн шалгаж байна.

Хүүхэд зодсон 190 дугаар цэцэрлэгийн багшийн хэргийг шүүхэд шилжүүллээ
Нийслэлийн Хан-Уул дүүргийн 12 дугаар хорооны нутаг дэвсгэрт байрлах 190 дүгээр цэцэрлэгийн бага бүлгийн багш Д.Цэнд-Аюуш ангийн хүүхдээ зодсон байдаг. Улмаар эл хэрэгт цагдаагийн байгууллага эрүүгийн хэрэг үүсгэн шалгаж, мөрдөн байцаалтын ажиллагаа дууссан юм.
Энэ хэрэгт  дүүргийн 2 дугаар прокурорын газраас  хяналт тавьж ажилласан бөгөөд яллагдагч Д.Цэнд-Аюушт  Монгол Улсын Эрүүгийн хуулийн тусгай ангийн 100 дугаар зүйлийн 100.1 дэх хэсэгт зааснаар прокурорын яллах дүгнэлт үйлдэж, хэргийг  энэ сарын 12-ны өдөр шүүхэд шилжүүлжээ.

Хоёр охиныг хэрцгийгээр хөнөөсөн хэрэг гарч, олныг сэртхийлгэлээ
Баянзүрх дүүргийн есдүгээр хороо, Шар хадны эцэст хоёр эмэгтэйг хэрцгийгээр хөнөөж, овоонд булсан хэрэг гарсан.  Тодруулбал, Шар хадны эцсийн буудлаас 300 метрийн зай буюу  Шар хад уулнаас хоёр хүний гар, хөл, толгойгүй болсон цогцос олдсон байдаг. Улмаар цагдаа нар тухайн газрын ойр орчмоор шалгалтыг явуулж, хэрэгт нотлох баримт болохуйц эд зүйлсийг цуглуулж, шуурхай ажилласны үр дүнд гэмт этгээд, сэжигтэн этгээдийг 48 цагийн дотор олсон юм. Хоёр талийгаач охидын хувьд 19, 20 настай залуухан аж.

“Гал үндэстэн” холбооны гишүүдийг хорих ангиудад хуваарлилаа
"Урт нэртэй” хуулийг хэрэгжүүлэхийг шаардан галт зэвсэг, тэсрэх бөмбөгтэй жагсаал зохион байгуулсан “Гал үндэстэн” холбооны тэргүүн Ц.Мөнхбаяр нарт холбогдох хэргийг өнгөрөгч сард Нийслэлийн шүүхэд хэлэлцэж, ялыг нь бууруулсан.

ШШГЕГ-ын харьяа хорих 461 дүгээр ангид хоригдож байсан тэднийг өнгөрсөн долоо хоногийн пүрэв гаригт өөр ангиуд руу хуваарилжээ. Д.Төмөрбаатарыг Өвөрхангайд, Г.Болдбаатарыг Амгалангийн 421 дүгээр хорих ангид, Ж.Ганболдыг “Ганц худаг”-ийн салбар Дарь эхийн хориход, Ё.Дашцэрэнг Дархан руу шилжүүлсэн байна.

Харин тус холбооны тэргүүн Ц.Мөнхбаяр одоогоор 461 дүгээр ангид хоригдож байгаа бөгөөд хаашаа шилжүүлэх нь тодорхойгүй байгаа аж.

Эхнэрээ хөнөөсөн гэх цагдаагийн хошуучийн хорих хугацааг сунгалаа
Өнгөрсөн сарын 18-ны  шөнө 02.30 цагийн орчимд Т гэх эмэгтэй нөхөр болох цагдаагийн хошууч  О-д зодуулж амиа алдсан гэх ноцтой хэрэг гарсан. А.Отгонбаяр согтуурлах  ундаа хэрэглэсэн үедээ эхнэрийгээ  тамлан зодож, дөрвөн давхарын цонхоор шидсэн талаар талийгаачийн ар гэрийнхэн яриад байгаа. Харин цагдаагийн байгууллагын зүгээс түүнийг хүнийг эхнэрээ амиа хорлоход нөлөөлсөн байж болзошгүй хэмээн цагдан хориод байгаа.  Тэгвэл энэ сарын 2-ны өдөр түүний цагдан хорих хугацааг сунгажээ.

Оюутнуудыг барьцаалж, нэг иргэний аминд хүрсэн ноцтой хэрэг гарлаа

Хан-Уул дүүргийн 12-р хороонд Биокомбинатад байрлан Мод үржүүлэх төвд энэхүү хэрэг гарсан юм. Тухайн компанид шинээр орсон ажилтан нь согтуурсан үедээ дадлага хийж байсан 10 гаруй оюутныг сүрдүүлж, хоолойнд нь хутга тулгаж барьцаалсан хэрэг гарсан. Мөн нэг иргэн амиа алдаж, өөр нэг иргэн бэртэж гэмтсэн юм. Улмаар хэргийг мөрдөн байцаалт одоогоор үргэлжилж байгаа бөгөөд сэжигтэн этгээдийг цагдан хорьсон юм.