Ганц худагт хууль бусаар хоригдож 36 хоног өлсгөлөн зарлаад байгаа Н.Вандансангийн өмгөөлөгчид өнөөдөр хэвлэлийн хурал хийлээ. Энэ үеэр өмгөөлөгч  Г.Батбаяраас Газрын тосны газрын дарга агсан Д.Амарсайханы талаар асууж тодрууллаа.  Учир нь тэрбээр талийгаачийг нас барахаас нь өмнө очиж уулзсан юм.

-Та Газрын тосны газрын  дарга асан Д.Амарсайхантай нас барахаас нь өмнө уулзсан гэсэн. Энэ талаар?
-Би Д.Амарсайхан агсантай нас барахаас нь тав хоногийн өмнө уулзсан. Тухайн үед Д.Амарсайхан агсан хэлэхдээ “Би хэрэг хийгээгүй учраас   шүүх нь тогтоогоод өгнө биз. Шүүхээр эцэслэн шийдэгдэх хүртэл гадуур байцаагдамаар байна.Намайг гадуур байцаагдах талаас хөөцөлдөөд өгөөч” гэсэн. Тухайн үед би эрх зүйн туслалцаа үзүүлэх гэрээгээ мартсан байсан учраас тав хоногийн дараа ахин ганц руу явж байхад нас барсан.

-Д.Амарсайхан агсаныг нас барах өдөр  өмгөөлөгч нь уулзахаар явж байсан гэсэн мэдээлэл гарч байсан. Тэр өмгөөлөгч нь та байсан уу?
-Тиймээ. Би гэрээн дээрээ гарын үсэг зуруулахаар явж байсан.

-Одоо нас барсан учраас хэргийг хэрхэн шийдэх вэ?
-Одоо нас барсан учраас хэргийг хэрэгсэхгүй болгоно гэсэн үг. Тэр хүн хуулийн хохирогч, золиос болсон. Буруутай этгээдүүд нь тодорхой байгаа.