Хөвсгөл аймгийн Жаргалант сумын нутаг Мааньт хороололд ноцтой хэрэг гарсаныг бид мэдээлж байсан.  Тодруулбал, иргэн Ж согтууруулах ундаа хэрэглэсэн үедээ бусадтай маргалдаж "Дорвинк" маягийн буугаар хоёр  хүний амь насыг хороон, хоёр хүнийг шархдуулаад дараа нь өөрийгөө буудаж хороосон юм.  Тэгвэл уг хэрэг явдлын талаар ЦЕГ-ын хэвлэл мэдээллийн төвийн дарга, цагдаагийн хурандаа Б.Баатархүүгээс тодруулахад "Энэ сарын 12-нд Хөвсгөл аймгийн цагдаагийн газарт Жаргалант сумын төвийн Маань хорооллын нутаг дэвсгэрт тус сумын иргэн Ж согтууруулах ундаа хэрэглэсэн үедээ бусад руу буудаж танхайраад байна гэсэн дуудлага ирсэн. Улмаар цагдаагийн байгууллагын алба хаагчдыг очиход тухайн иргэн хэрэг үйлдэх үедээ архидан согтуурсан байсан. Улмаар хоёр хүний аминд хүрч, дахин хоёр хүнийг шархдуулж гэмтээгээд өөрийнхөө амь насыг хохироосон байгаа. Ж гэгч нь 1970 онд төрсөн. Хөвсгөл аймгийн Галт сумын иргэн. Өдгөө 44 настай. Ээж, дүү нарын хамт амьдардаг. Ажил хөдөлмөр эрхэлдэггүй нэгэн байсан. 2006, 2011 онд шүүхээр таслагдаж байсан. Цагдаагийн байгууллагын хяналтанд байж байгаад дөрөвдүгээр сард хяналтын хугацаа нь дууссан байхдаа эл хэргийг үйлдсэн байгаа" гэв.

Дашрамд хэлэхэд, энэ этгээд архидан согтуурсан үедээ янз бүрийн ааш араншин гаргадаг, бусдад бухимдлаа гаргадаг нэгэн байжээ.