Чуулганы хуралдаанаар Монгол Улсын 2014 оны төсвийн тодотголын хоёрдугаар хэлэлцүүлгийг хийж байна. Баригдаж байгаад дутуу орхигдсон сургууль, цэцэрлэг, эмнэлэгийн барилгын санхүүжилтийг үргэлжлүүлэх эсэх асуудлыг яг одоо хэлэлцэж байна. Мөн обьектуудын хөрөнгө оруулалтын зардал яагаад өссөн, зардал өссөн байтал яагаад Төсвийн байнгын хороо ажлын хэсгийн саналыг дэмжиж оруулж ирэв гэсэн асуудал хөндөгдөв.
Мөн УИХ-ын гишүүд урсгал зардлаа танаж, хөрөнгө оруулалтын ажлаа энэ онд багтаан хийх боломжийг УИХ бүрдүүлэх ёстой. Ингэхгүй бол хөрөнгө оруулалтгүйгээс барилгын ажил нь явахаа больсон олон ажил цалгардаж, хэнд ч хэрэггүй обьект болж хувирна хэмээн гишүүд шүүмжиллээ. Түүнчлэн эл асуудлыг шийдэж өгөөгүй цагт банкин дахь чанаргүй зээлийн хэмжээ өснө гэсэн тайлбарыг УИХ-ын Төсвийн байнгын хорооны дарга өгөв.
Түүний тайлбарласнаар өнгөрсөн онд чанаргүй зээлийн хэмжээ 110 тэрбум төгрөг байсан бол одоо 290 тэрбум төгрөг болж өсчээ. Нийт 290 тэрбум төгрөгтэй тэнцэх чанаргүй зээлийн 90 тэрбум нь улсын төсвийн хөрөнгө оруулалтаар хийх ажлыг авсан компаниудад хамаарч буй аж. Тэдгээр компаниуд арилжааны банкнаас зээл аваад улсын төсвийн хөрөнгө оруулалтаар хийх ажлыг эхлүүлчихсэн байдаг, гэтэл улсын төсвөөс хөрөнгө нь орж ирдэггүй. Ажил нь дуусах болоогүй байдаг, дээр нь валютын ханшийн өсөлтөөс болж эрсдэл хүлээсэн байдаг. Тиймээс 2014 оны төсвийн тодотголыг хэлэлцэх үеэр “царцаагдсан” обьектуудын хөрөнгө оруулалтын зардлыг УИХ шийдээд өгөх нь зөв юм. Ийм арга хэмжээ авахгүй бол банкны салбараа ч эрсдэлд оруулна” гэсэн юм.
УИХ-ын гишүүдийн зүгээс сонгогдсон тойрогт нь дутуу баригдсан сургууль, цэцэрлэг, сурагчдын дотуур байр, эрчим хүчний ажлыг үргэлжлүүлж хийх ёстой. Тиймээс Засгийн газраас хөрөнгө санхүүг нь гаргаж өгөхийг шаардаж байна гэлээ. Харин Сангийн сайд Ч.Улаан дээрх барилгуудыг санхүүжүүлэх боломжгүй. Хэрвээ энэ ажлуудыг санхүүжүүлнэ гэвэл өрийнхөө таазыг нэмж 70 хувь болгож болно. Үүнээс өөр шийдвэрлэх арга байхгүй гэсэн хариултыг өгөв.Тодруулбал Ховд аймагт царцаагдсан олон барилга байгаа аж. Гэтэл тэр обьектуудыг ач холбогдолтоор нь эрэмбэлж байгаад барилгын ажлыг дуусгах биш яам тамгын газраар их гүйсэн хүнийх нь ажлыг гүйцэтгэхээр болж байгаад гомдолтой байна гэсэн саналыг Д.Батцогт гишүүн хэллээ. Тэрбээр нэн чухал обьектуудыг эрхтэн ашиглалтанд оруулах хэрэгтэй гэв.
Харин С.Бямбацогт гишүүн “Олон жилийн өмнө сургууль, цэцэрлэг, эмнэлэг, зам, эрчим хүчний ажлын санхүүжилтийг эхлүүлсэн. Гэтэл Засгийн газраас тэдгээр барилгуудын ажлыг дуусгах биш өөр шинэ ажлыг эхлүүлээд явсан. Хэрвээ төрийн бодлого зөв явж байсан бол энэ ажлууд чинь аль эрт дуусчихсан байгаа” гэв.
Харин УИХ-ын гишүүн Д.Оюунхорол “Сургууль, цэцэрлэг, эмнэлэг зэрэг чухал хэрэгтэй обьектуудын барилгыг дуусгах шаардлагатай. Энэ ажлыг дуусгах гэтэл Засгийн газар “Сум бүрт 5 тэрбум төгрөг өгнө өө” гээд өгсөн. Яах гэж тэгсэн юм бэ. Түүний оронд цэцэрлэг, сургуулийг нь бариад өгчихгүй яасан юм. Өнөөдөр олон аж ахуй нэгж хаалгаа барьж, дампуурч байна. Үүнийхээ хариуцлагыг Засгийн газар хүлээх ёстой. Сургууль, цэцэрлэг барих мөнгөгүй болгосон, буруу бодлого явуулсан хүмүүс хариуцлагаа хүлээ. Иргэд бол тойргоосоо сонгогдсон гишүүдэд асуудлаа хэлдэг. Бид үүнийг шийдвэрлүүлэхийн төлөө ажиллана шүү дээ. Бидний буруу энд байхгүй. Бид сонгогдынхоо захисаныг ажил хэрэг болгох гэж явж байна. Харин Засгийн газар буруу хүлээж, хариуцлагаа хүлээх ёстой” гэв.
Ийнхүү УИХ 2014 оны төсвийн тодотголын хоёр дахь хэлэлцүүлгийг хийж дуусгалаа.
