Энэ сард гаалийнхны илрүүлж, цагдаагийн байгууллагад шилжүүлсэн зарим хэргүүдийн талаар танилцуулж байна.
Мансууруулах бодис 2 кг-ийг оруулахыг завдав
Гашуунсухайт дахь гаалийн газрын гаалийн улсын байцаагч нар хөдөлгөөнт хяналтын эрэлч нохой ашиглан улсын хилээр орох чиглэлд энэ сарын 20-нд нэвтэрсэн 2783 ӨМА улсын дугаартай фургон авто машинд биет шалгалт зохих хууль, журмын дагуу хийсэн байна. Гэтэл уг автомашинаар зорчиж явсан Монгол Улсын иргэн Ц нь “мими” гэх мансууруулах төрлийн бодис байж болзошгүй 2 кг орчим нунтаг цагаан зүйлийг автомашины эд ангид нууж улсын хилээр нэврүүлэхийг завдсаныг илрүүлсэн байна. Гаалийн байгууллага эрүүгийн шинж чанартай энэ хэрэгт хойшлуулшгүй ажиллагаа явуулж Цагдаагийн байгууллагад шилжүүлсэн байна.
Алмазан шигтгээтэй үнэт зүйлс хууль бусаар гаргахыг завджээ
Буянт-Ухаа дахь Гаалийн газрын гаалийн улсын байцаагч нар Тагнуулын
байгууллагын мэдээлэлд үндэслэсэн гаалийн хяналт шалгалтыг оновчтой
зохион байгуулсан байна. Уг үйл ажиллгааны үр дүнд өнгөрсөн сарын 6
өдөр УБ-Бээжин чиглэлийн ОМ-223 онгоцоор зорчих гэж байсан Монгол Улсын
иргэн Я, Ц -гийн гар тээш, биед гаалийн хяналт шалгалт хийхэд үнэт
металлаар хийгдсэн, алмазан шигтгээтэй 18 нэр төрлийн үнэт зүйлс гэх
барааг гаалийн байгууллагад мэдүүлэлгүй хууль бусаар улсын хилээр гаргах
гэж байсан үйлдлийг илрүүлж таслан зогсоосон байна.
Зөрчлийг
илрүүлсэн гаалийн улсын байцаагч нар болон тагнуулын ажилтан нар дээрхи
18 нэр төрлийн үнэт зүйлс гэх бараа тус бүрийн сертификат дээрх
үнэлгээг нэмж тооцоход 3,560,000,000 төгрөг болж байсан бөгөөд энэ нь 1
ам долларын ханшыг 1780 төгрөгөөр үндэслэн тооцоолсон үнэ болно.
Барааны
эзэн гэх Я нь дээрх үнэт эдлэл гэх бараагаа 2 сая ам долларын үнэтэй
гэж амаар мэдүүлж байсан байна. Гаалийн улсын байцаагч уг эрүүгийн
шинжтэй хэрэгт хойшлуулшгүй ажиллагаа явуулж Тагнуулын байгууллагад эд
мөрийн баримтын хамтаар шилжүүлсэн байна.
Гар тээшиндээ их хэмжээний эм, бэлдмэл авч явсан иргэнийг саатууллаа
Гаалийн байгууллага эрсдэлийн судалгаанд үндэслэсэн гаалийн хяналт шалгалтыг тогтмол зохион байгуулж байна. Үүний үр дүнд Гаалийн ерөнхий газрын харьяа Сэлэнгэ аймаг дахь Гаалийн газрын гаалийн улсын байцаагч нар Алтанбулаг боомтоор өнгөрсөн сарын 27-ны өдөр ОХУ- аас зорчин явсан зорчигчдийн гар тээшинд гаалийн хяналт шалгалт хийсэн байна. Уг шалгалтаар Монгол Улсийн иргэн С нь гар тээшиндээ их хэмжээний эм, эмийн зүйл, хүнсний нэмэлт бүтээгдэхүүнийг нуун улсын хилээр хууль бусаар нэвтрүүлэх гэж байсныг илрүүлсэн байна. Уг эрүүгийн шинж чанартай хэрэгт хойшлуулшгүй ажиллагаа явуулж Сэлэнгэ аймгийн Цагдаагийн газарт шилжүүлсэн байна.
Дээрх зургууд бүгд хурааж авсан эд зүйл мөн болно.
Сэтгэгдэл (2)