Их Британийн нэр хүндтэй “Times” сонин “Рио Тинто компани Монголын Засгийн газрын харилцаа төвөгтэй болж байгаа учраас 300 ажлын байраа танахаар төлөвлөж байна” гэж нийтэлжээ. Оюутолгойн зэс, алтны уурхай хүн ам нь тархан суурьшсан жижиг үндэстнийг өөрчлөх боломжтой бөгөөд 2021 он гэхэд Монголын дотоодын нийт бүтээгдэхүүний гуравны нэгийг үйлдвэрлэдэг болно хэмээн Олон улсын валютын сан таамагласан тухай тус сонинд бичсэн байна. Мөн  “Уурхайн 34 хувийг эзэмшдэг Монголын Засгийн газартай тохиролцож чадаагүй болохоор өнгөрсөн онд гүний уурхай өргөтгөлийн асуудал хойшлогдсон” хэмээн онцолсон байна.
    Харин Монгол Улсын ерөнхий сайд Н.Алтанхуяг Оюутолгойн ажилтнуудаа халах болсон шалтгааныг огт өөрөөр тайлбарласан юм. Тодруулбал, “Оюутолгой" ХХК ТУЗ-ийн гишүүн Отгочулууг дуудаж уулзсан. "Оюутолгой" ХХК  биш Рио Тинто  өөрийн нөхцөл байдлыг хэцүү байна гэж үзээд нэг миллиард долларын хэмнэлт гаргахаар болсон байна. Тиймээс бүх улсад ажиллаж байгаа хүмүүсээ цомхотгож байгаа” гэж хэлсэн билээ.
Ийнхүү Монголын Засгийн газар уул уурхайн салбарын ажилтныг халах болсон шалтгааныг хөрөнгө оруулагчдын санхүүгийн байдал тааруу байгаатай холбосон бол гадаадын хэвлэлд Рио Тинтотой ойлголцож чадаагүйгээс боллоо гэж тайлбарлаж байна. Эдийн засгийн нөхцөл байдал хүнд байгаа үед ажилтнуудаа ийнхүү халлаа. Дээрх мэдээллүүдийн аль нь үнэн болох нь эргэлзээтэй ч Монголын уул уурхайн толгой компани ажилтнуудаа халсан нь гадаадын хэвлэлүүдийн хараанд өртөөд эхэлжээ.