“MCS групп” азийн хамгийн том сүлжээ зочид буудал болох Шангри-Лагийн салбарыг Улаанбаатар хотод нээхээр 2006 оноос хойш ажиллаж нэг биш бүтээн байгуулалтын ажлыг хэрэгжүүлсэн ч өнөөдрийг хүртэл тус зочид буудал салбараа нээж чадаагүй л байна. Анх дуурын театрын харалдаа жижиг цэцэрлэгт хүрээлэнгийн багагүй газрыг авч Шангри-Ла зочид буудлыг барьж эхэлсэн нь багагүй маргаан, хэл амыг таталсан. Гэвч барилга баригдаж дууссан хойно энэ нь зочид буудал биш “MCS групп” компаний төв оффис болчихсон. Үүнийг нэг хэсэг нь анхнаасаа хотын төвийн газрыг луйвардаж авсан алхам гэж хардах нь бий. Харин эх сурвалжийн мэдээллэж байгаагаар тухайн барилга нь хангалттай автомашины зогсоолгүй мөн өмнө нь байрлах цэцэрлэгт хүрээлэнг зочид буудлын мэдэлд өгөхөөс татгалзсан гэсэн шалтгаанаар Шангри-Лагийн удирдлагууд дээрхи барилгаас татгалзсан аж. Ингээд нэгэнт их хэмжээний хөрөнгө оруулалт хийгдсэн тус барилгаа “MCS групп” арга буюу өөрсдийн оффис болгож томоохон брендүүд, үйлчилгээний байгууллагуудад түрээслүүлэх болсон байна. Ямартай ч ногоон байгууламжийг булааж барилга барилаа гэж шүүмжилж байсан иргэд “Central Tower”-ийг ашиглалтанд орсны дараа огт эсэргүүцээгүй. Их хотын өнгө үзэмжийг нэмсэн сүрлэг сайхан барилга босч өмнөх цэцэрлэгт хүрээлэн нь урдынхаасаа илүү өнгө зассанд иргэд талархалтай хандасны илрэл энэ буй за.
Ийнхүү Шангри-Ла зочид буудлыг Улаанбаатарт оруулж ирэх анхны оролдлого бүтэлгүй болсон. Гэтэл хоёр өдрийн өмнө Шангри-Ла зочид буудлын бүтээн байгуулалтын хоёр дахь төсөл азгүйтэлтэй учирлаа. Хүүхдийн Паркаас хэл амтай салгаж авсан гэгдэх энэ газарт “MCS групп” Монголд байхгүй Азидаа ховорхон орон томоохон бүтээн байгуулалтын ажлыг эхлүүлж Шангри-Ла зочид буудлын Улаанбаатар дахь салбарыг нээхээр ажиллаж байгаа. Төслийн нийт өртөг 500 сая ам.доллар болно. Төслийн хүрээнд хоорондоо холбогдсон гурван аварга цамхаг сүндэрлэх ба нэг оффис центер 24 давхар275 өрөөтэй, 34 давхар 200 өрөөтэй дээд зэрэглэлийн тус тус хоёр ч зочид буудал, кино театр, бялдаржуулах төв, дэлхийд нэр хүндтэй сүлжээ ресторанууд, тоглоомын газрууд зэрэг дотоодын аялал жуулчлалын төв болохуйц цогцолбор байгууламж барихаар ажиллаж байгаа ажээ.

Гэтэл азгүй явдал тохиолдож Шангри-Ла зочид буудлын барилга галд автаж маш том хохирол амсав. Тус барилгын 22 давхарт гарсан галыг унтаарахад манай аврах анги байгууллагын техник хэрэгсэл хүчин мөхөсдөж байлаа. Бүхэл бүтэн 3-4 цаг ноцолдож байж галыг бүрэн дарсан бөгөөд одоогийн байдлаар барилгыг цаашид үргэлжлүүлэх боломжтой эсэхийг тодорхойлоогүй байна. Гэвч маш их шил орсон, ган хийц нь ил байсан барилгыг үргэлжлүүлэн барих бараг боломжгүй гэдгийг мэргэжлийн хүмүүс тайлбарлаж байна. Хэрвээ барилгыг үргэлжлүүлэн барих боломжгүй гэсэн дүгнэлт гарвал “MCS групп” маш том хохирол амсахаар болоод байна.

Бурханы амар амгалангийн орны нэрээр нэрлэгдсэн Шангри-Ла зочид буудал Улаанбаатарт салбараа нээхэд тун ч их хяслантай байна. Өмнөх бүтэлгүйтэл дээр саяын гал түймрийн явдал нэмэгдэж хөрөнгө оруулагчид Шангри-Лаг Улаанбаатарт байгуулахаас татгалзахад хүрч магадгүй гэсэн мэдээлэл үүнээс улбаатайгаар тарах боллоо. Дарин дээр давс гэгчээр Монголын эдийн засаг ойрын хэдэн жилдээ тун хүнд замыг туулах нь тодорхой болсон нь Шангри-Ла энэ үйл явдлаар далимдуулж салбараа нээх гэрээ хэлэлцээр, хөрөнгө оруулалтаа хойшлуулах завшаан гаргаж магадгүй болоод байгаа гэнэ. Зочид буудлын бизнес нь маш урт хугацаанд өртөгөө нөхдөг. Хамгийн багадаа 5-10 жил ажиллаж байж анхны хөрөнгө оруулалтаа нөхдөг гэдгийг мэргэжилтнүүд онцолж байна.

Шангри-Лагийн хувьд Монголд орж ирэхээр 2006 оноос хойш хөөцөлдөж байгаа ч өнөөдрийг хүртэл амжилт олсонгүй. Мөн 2015 онд ашиглалтанд оруулна гэж байсан барилга нь галд автаж, Монголын эдийн засаг хэдэн жилдээ л сэргэлт авахааргүй болтолоо хүндэрсэн нь тэдэнд хөрөнгө оруулалтаа татах, Монголоос гарах том нөхцлийг бүрдүүлж болзошгүй байна гэж эх сурвалж мэдээллэж байна.