Мексикт болсон эсэргүүцлийн цуглааны үеэр 43 оюутан ор сураггүй алга болсон хэрэг дэлхий нийтийн анхаарлын төвд байна. Оюутнуудын 17-ыг нь дээрэмчид хөнөөж, цогцсыг нь хаясаныг Гьерреро мужийн ахлах прокурор Инакый Бланко мэдэгджээ. Цогцоснуудыг шатааж, заримыг нь зэрэмдэглэсэн учир таниулах ажиллагаа 15 хоног үргэлжилнэ гэв.
    Өнгөрсөн есдүгээр сарын 26-нд Мехикогоос 200 км-ийн зайтай Игуала хотын ядуу дүүрэг болох Пуэбло Виежод оюутнуудыг хамгийн сүүлд харсан гэж гэрчүүд ярьж байна. Игуала хотын оюутны жагсаалыг цагдаа нар хүчээр тарааж, буудалцах үеэр зургаан хүн алагдаж, 25 хүн шархадсан билээ. Шөнөжингөө үргэлжилсэн мөргөлдөөнд дээрэмчид оролцож, оюутнуудыг автобусанд суулган авч явсан гэж сэжиглэж байна. Мексикт өмнө нь хар тамхины дайн дэгдэж, олон мянган хүний амь үрэгдэж байсан ажээ.