Гонконгийн төрийн өндөр албан тушаалтан асан шүүхэд мэдүүлэг өгөх үеэрээ 2007 онд Бээжингээс 11 сая гонконг доллар (1.4 сая ам.доллар)-ыг нэгэн бизнесмэнээр дамжуулан нууцаар авсан гэдгээ хүлээсэн болохыг орон нутгийн хэвлэлд мэдээллээ.
Дэлхийн санхүүгийн төвүүдийн нэг болох Гонконгийн төрийн нарийн бичгийн дарга байсан Рафаэл Хуй энэ улсын түүхэн дэх хамгийн том авлигын хэргүүдийн нэг дээр яллагдагчаар татагдан мэдүүлэг өгч байсан юм. Энэ нь Азийн томоохон компани болох “Сун Хунг Кай Пропертиз Лимитед”-ийг хамтран эзэмшигч тэрбумтан Томас Квок, Раймонд Квок нарт засгийн газрын хөнгөлөлт эдлүүлэхээр амлан тэднээс хээл хахууль авсан хэрэг юм. Хуйгийн мэдүүлгээс шалтгаалан хэргийн хүрээ улам тэлж Гонконгийн нутаг дэвсгэрээс хальж гарав. Түүнчлэн Гонконг болон эх газрын Хятадын төрийн албан тушаалтнуудын хэлхээ холбооны талаар шинэ асуудал үүсгэж байна.
Гонконгийн төрийн албаны хамгийн өндөр албан тушаалыг 2005-2007 онд хашиж байсан Рафаэл Хуй нийтдээ 37 сая гонконг доллар (4.77 сая ам.доллар)-той тэнцэх хэмжээтэй хээл хахуулийг удаа дараа төлбөр болон зээл хэлбэрээр авч байжээ.