Истанбул, Анкара хотуудад Курд үндэстнүүд цагдаа нартай мөргөлдөж, 12 хүн нас барж, хэд хэдэн хүн шархадсан байна. Курд үндэстнүүдийн оршин суудаг Диярбакыр хотод гарсан мөргөлдөөний улмаас долоон хүн амиа алдсаны дараа ийнхүү эсэргүүцэл өрнөсөн ажээ. Үүнтэй холбоотойгоор Туркийн таван мужид хөл хорио тогтоожээ. Цагдаа нар Курд үндэстнүүдийн жагсаалыг тараахын тулд нулимс асгаруулах хий, усан буу ашиглаж байна гэж AFP агентлагийн сурвалжлагч мэдээлэв. Туркийн Курдуудын дийлэнх нь Сирийн Кобане хотоос дүрвэн ирэгсэд гэнэ. Тиймээс тэдгээр хүмүүс Кобанед зовж буй ахан дүүстээ туслахын тулд Сирийн хил давахыг завдсан ч цагдаа нар хүчээр зогсоосон юм. Кобанед гурван долоо хоногийн дотор 400 гаруй Курд үндэстэн амиа алдсан билээ. Энэ хооронд Туркийн Курдуудын тэмцэл хүчээ авч байна.