Ерөнхий сайдын ахлах зөвлөх Л.Гансүх болон М.Тулга, Э.Төмөрбаатар нарыг “Нүүрс” хөтөлбөрийг хэрэгжүүлэх явцдаа 3.6 тэрбум төгрөгийг хувьдаа завшсан хэрэгт буруутган шалгахаар цагдан хориод байгаа. Тэднийг саатуулаад хоёр сар гаруйн хугацаа өнгөрч байгаа бөгөөд хэн хэнийг нь батлан даалтад гаргаагүй юм.

Л.Гансүх, М.Тулга нарыг хоригдох хугацаанд нь мөрдөн байцаагчийн зүгээс байцаалт авахгүй явсаар саяхан  хоёр удаа байцаалт авсан байдаг.

Цаашлаад М.Тулгын биеийн байдал тааруу байгаа гэх нотлох баримтыг шүүгчдэд танилцуулсан ч хүлээн аваагүй үргэлжлүүлэн хорих шийдвэр гаргасанд өмгөөлөгч хийгээд ар гэрийнхэн нь гомдолтой байгаа юм.  Хэргийг шалгах явцад хэд, хэдэн ноцтой зөрчил гарсан гэж Л.Гансүх болон М.Тулга, Э.Төмөрбаатар, Г.Батхуяг нарын ар гэрийнхэн мэдэгдсэн. Тодруулбал, тэднийг өнгөрсөн хугацаанд өмгөөлөгч болон ар гэрийнхэнтэй нь уулзуулахгүй хорьсон. Хоригдогч М.Тулга нь 2010 оноос хойш нурууны дискний мултралтай байсан атал хоригдож байх хугацаанд хорих ангийн харгалзагч нуруу руу өшиглөж гэмтлийг  нь сэдрээсэн гэдгийг хэлээд байгаа.

Гэвч ШШГЕГ-аас уг хорих ангид болоод алба хаагчдад шалгалт хийсэн ч М.Тулгыг зодоогүй гэдэг нь нотлогдсон гэв. Гэхдээ үүнийгээ ямар нэг баримттай, албан ёсоор олон нийтэд мэдээлээгүйд иргэд гайхаж байгаа юм.

М.Тулгын биеийн байдал өнгөрсөн амралтын өдрөөс эрс муудаж хэвтэрт орж, зүүн хөл нь мэдээгүй болсон гэдгийг ч ар гэрийнхэн нь хэвлэлийнхэнд дуулгасан юм.

Улмаар өчигдөр  “Сонгдо” эмнэлэгт М.Тулгыг шинжилгээнд оруулахыг зөвшөөрсөн бөгөөд “Сонгдо” эмнэлгийн захирал Б.Болдсайханы зүгээс шинжилгээг гардан хийж  түүнийг яаралтай хэвтүүлэх бичгийг өгчээ.
Тодруулбал, шинжилэгээний хариугаар яаралтай хэвтэж нурууны эмчилгээ хийлгэх ёстой гэсэн дүгнэлт гарсан бөгөөд  хорих ангийн эмч нарт хэвтүүлэх шаардлагатай байгаа тухай бичгийг хүргүүлжээ. Тиймээс хорих ангийн эмч нарын зүгээс түүнийг хэвтүүлж өгөхийг АТГ-т тавьсан ч хүлээж авахгүй байгааг эх сурвалж хэллээ.  Уг нь энэ бичгийг үндэслээд АТГ-ын байцаагч М.Тулгын хэвтэн эмчлүүлэх хэрэгтэй үгүйг шийдэх ёстой.  Гэвч тэд хүлээж авахгүй байгаагаас М.Тулгын биеийн байдал улам дордсоор байгааг өмгөөлөгчийнх нь зүгээс ч хэлж байна.

 Юутай ч хэрэг хийсэн нь нотлогдоогүй байхад хүнийг цагдан хорьчихоод батлан даалтад ч гаргахгүй байгаа хэрнээ биеийн байдал нь муудаж гадуур эмчилгээнд орох ёстой байтал зөвшөөрөхгүй байгаа АТГ-т иргэд шүүмжлэлтэй хандаж байгаагаа цахим хуудсуудаар илэрхийлж эхэллээ.