15 настай Язидис охиныг “Исламын улс” бүлэглэлийнхэн Ирак дахь гэрээс нь хулгайлан авч явж, Сирид боол болгон зарах гэж байжээ. Тэр бол хэт даврагчдаас айж, Синжар ууланд бүгж байсан олон мянган Язидис үндэстнүүдийн нэг юм. Иракийн алс бөглүү тосгоны хоргодох байранд холын хамаатнуудтайгаа амьдарч байсан түүнийг хүч хэрэглэн авч явсан гэнэ. Охины хоёр эгч нь хэт даврагчдын гарт байгаа бөгөөд аав, ах, бусад хамаатнууд нь амьд эсэх нь тодорхойгүй байна.
    Хэт даврагчдын гараас арайхийн мултарч, Турк руу зугтсан Язидис охин хэт даврагчид хэрхэн дураараа аашилж буйг гэрчлэв. Түүний ярьж буйгаар хэт даврагчид охидын гарыг шалбалж, нүд салгалгүй хянаж цагддаг гэнэ. “Чиний нэрийг өөрчилж Абеер болгосон болгохоор ар гэрийнхэн чинь хэзээ ч танихгүй. Чи лалын шашинтан болсон” хэмээн айлган сүрдүүлж байсан тухай ярив. Тэрээр өөрийнхөө үйлчилж байсан Саудын Араб эрийн цайнд нойрсуулах эм хийж, гэрээс нь зугтжээ.

    Харгис этгээдүүдийн гараас мултарсан охидын дийлэнх нь хүчиндүүлсэн байдаг бөгөөд тэдний дунд таван настан хүртэл байгаа нь сэтгэл эмзэглүүлэм дүр зураг юм. Мөн охидыг Палестин хүмүүстэй хүчээр гэрлүүлж, буу зэвсгээр айлгаж сүрдүүлэн гэрийн хорионд байлгадаг ажээ. Тэд охидыг өөрсдийн хяналтандаа авсан Иракийн Мосул хотод орогнуулдаг гэсэн мэдээлэл байна.